Қашқадарё вилоятининг Деҳқонобод тумани ҳокими Зоир Алиқулов вилоятдаги ҳамкасбларининг ОАВга қай даражада очиқлиги ҳақида гапирди. Бу ҳақда «Дарё»га туман ҳокимлиги ахборот хизмати хабар берди.
Ҳоким блогер Жонибек Норқуловнинг «ҳамкасбларингиздан айнан кимларни ОАВ учун очиқ деб айта оласиз», деган саволига «Ҳамкасбларимдан Шаҳрисабз тумани ҳокими ва Ғузор тумани ҳокимларининг ОАВга бўлган очиқлигига, шунингдек, вилоятимиз раҳбарининг оммавий ахборот воситаларига бўлган эътиборини кўриб, ҳавас қиламан.
Шунингдек, ижтимоий тармоқларда Қарши шаҳар ҳокимининг ҳам барча ОАВ вакиллари учун доимо очиқлигини кўрамиз. Ўйлайманки, Қашқадарёда ОАВ вакиллари учун тўсиқ қўйган ёки улардан қочадиган ҳокимлар йўқ. Барчаси ОАВ учун очиқ ва ошкора.
Фаолиятини тўғри ташкил қилган раҳбар ОАВдан қўрқмайдиган, улар билан тўғридан-тўғри мунозара қилишга тайёр раҳбар бўлади. Тан оламиз, сиз журналистларнинг саволларингизга баъзан қандай жавоб беришни билмайдиган ёки ОАВ вакилларидан қочаётган раҳбарларни ҳам кўрганмиз», — дея жавоб берган.
Эслатиб ўтамиз, аввалроқ Шаҳрисабз тумани ҳокими Самад Ҳасанов уни ғалла ўғрилигида айблаган фермерни ОАВ вакиллари ва блогерлар олдида камералар қаршисида суҳбатга чорлагани, аммо фермер воқеа жойига келиб, ҳоким билан юзма-юз бўлмай кетиб қолгани хабар берилганди.
Изоҳ (0)