Халқ таълими вазири ўринбосари Иброҳим Жўраев вилоят халқ таълими бошқармаси бошлиғи Дилфуза Садриддинова билан Жиззахдаги селдан талафот кўрган 15-умумий ўрта таълим мактабларида бўлди. Бу ҳақда ХТВ матбуот хизмати хабар берди.
Маълум қилинишича, мактаб биносининг зарар кўрган қисмлари, хусусан, том қисми зудлик билан таъмирлаш лозимлиги юзасидан тезкор чора кўриш бошланган.
Шунингдек, масъуллар селдан талафот кўрган педагог ва техник ходимлар хонадонида бўлиб, улар ҳолидан хабар олган. 15-умумий ўрта таълим мактабининг ходимларига зарурий озиқ-овқат маҳсулотлари етказиб берилиб, зарур ёрдам кўрсатилган.
20 апрель куни Ўзбекистоннинг айрим ҳудудларида кучли ёғингарчилик натижасида сел оқимлари ва тошқин сувлари юзага келгани тўғрисида хабар берилганди. Жиззах вилояти прокуратурасига кўра, вилоятда юз берган селда 5 киши вафот этган. ФВВнинг Гидрометеорология хизмати марказига таяниб маълум қилишича, 20 апрель куни Самарқанд ва Жиззах вилоятларида 1,5 соат ёғиб ўтган ёмғир бир ойлик ёғингарчилик миқдорини ташкил этган.
Изоҳ (0)