АҚШда Лос-Анжелес ҳудудида Union Pacific компаниясининг почта посилкаларини оммавий равишда ўғирлаш ҳолатлари кузатилмоқда. АҚШ ОАВ содир бўлаётган воқеаларни фалокатли фильмалардаги саҳналарга қиёслаган. «РБК» ҳодиса ҳақидаги фотогалереяда фильмлардагига ўхшаш тасвирлар қандай эканлиги ҳақида маълумот берган. Қуйида уни эътиборингизга ҳавола қиламиз.
АҚШнинг энг катта темир йўл компанияларидан бири бўлган Union Pacific Лос-Анжелес ҳудудида ҳаракатланган маҳсулот ташийдиган поездлардан доимий равишда буюмлар ўғирлаб кетилаётгани туфайли маршрутни ўзгартиришни режалаштирмоқда, дея хабар қилган Bloomberg.
Компания расмийлари полиция жиноятчиларга қарши самарасиз кураш олиб бормоқда деб ҳисоблайди. Маҳаллий судларда бундай ҳолатлар майда ҳуқуқбузарлик деб малакаланади, қўлга олинган безорилар эса бир суткадан ҳам кам қамоқда ўтиради, дейилган компания мансабдори томонидан Лос-Анжелес округ прокурорига ёзилган хатда.
«Жиноятчилар бизнинг қўриқчиларимиз устидан кулади, сабаби жиноят оқибатида уларга нисбатан ҳеч қандай жиддий жазо чораси кўрилмайди», — дейилади Union Pacific мактубида.
Бир йил ичида Лос-Анжелес округида темир йўллардаги ўғриликлар 160 фоизга кўпайган, айниқса охирги уч ой ичида байрам мавсумида вазият чўққига кўтарилган. 2021 йил октябрь ойида Union Pacific поездларидаги ўғриликлар сони 2020 йилнинг мос даврига нисбатан 356 фоизга ошган.
«Бундай бўлишини хаёлимга ҳам келтирмагандим, бунақаси ҳали бўлмаган. Вазият ақлга сиғмайдиган даражада», — дея бўлаётган ҳодисаларга изоҳ берган Union Pacific матбуот котиби Лупе Вальдес. Аёлнинг сўзларига кўра ушбу жиноятлар учун харидорлар тўлов тўлайди: «Биз истеъмолчи сифатида мана шу аҳмоқона ҳолатлар учун ҳам товон тўлаймиз».
Ўғирланган посилкаларнинг ҳисоби мингдан ошган, дейилади АҚШ оммавий ахборот воситаларининг хабарларида.
«Ҳолатлар худди учинчи дунё мамлакатида содир бўлаётганга ўхшайди», — дея ОАВда тарқалган фотосуратларга изоҳ берган Калифорния губернатори Гевин Ньюсом.
Union Pacific’нинг буюртмаларни етказиб бериш хизматларидан UPS ва FedEx каби энг катта логистик компаниялар фойдаланади. Вазият уларнинг бизнеси ва мижозларига ҳам салбий таъсир қилган, дейилади Union Pacific баёнотида.
Темир йўлдаги ўғриликлар сабаб рельслар атрофи чиқиндиларга — қадоқланган қутилар парчалари ва очилган посилкаларнинг бўлакланган қисмларига тўлган.
20 январда Лос-Анжелес губернатори Гевин Ньюсом (юқоридаги фотосуратда марказда) Union Pacific темир йўлига келган, бу ерни чиқиндидан тозалаш ишларида қатнашди ва ўғриликларга қарши кураш кучайтирилишини ваъда қилди.
«Ўтган ҳафтада сиз кўрган ҳодисаларга йўл қўйиб бўлмайди. Мен камзулим ва бўйинбоғимни ечиб келдим, чунки бунга чидаб тура олмаян. Жин урсин, бу ерда нималар бўляпти ўзи?», — деган Ньюсом.
Кўплаб ҳуқуқ-тартибот идоралари компаниянинг эътирозларини эътиборсиз қолдирган бир паллада Лос-Анжелес округ прокурори вазиятга муносабат билдирган.
«Union Pacific’нинг хавотирига жиддий қараймиз ва яқин вақт ичида вазиятни муҳокама қилиб олмоқчимиз», — дея эътирозларга жавоб берган прокурор.
Изоҳ (0)