Қашқадарё вилоятининг Касби туманидаги туғуруқхонада бир кунда уч нафар эгизак қизалоқ ва Фотима-Ҳусан исмли чақалоқлар дунга келди. Бу ҳақда «Дарё»га туман ҳокимлиги ахборот хизмати раҳбари Гулилайло Тугалова хабар берди.

Фото: «Дарё» / Гулилайло Тугалова

Қайд этилишича, Фарангиз, Меҳрангиз ва Паризода исмли қизалоқлар Жамшид Сатторов ҳамда Муҳсина Суннатовалар хонадонида дунёга келган. Фотима ва Ҳусан исмли эгизак чақалоқлар тумандаги Аҳмедовлар оиласида туғилган.

Фото: «Дарё» / Гулилайло Тугалова

«Эгизак қизалоқлар 2022 йилнинг 11 январь куни Хўжаҳайрон қишлоғида яшовчи Жамшид Сатторов хонадонида туғилган. Қизалоқлар муддатидан олдин туғилган бўлса-да, аҳволи яхши. Айни кунда шифокорлар назоратида», — дейди Гулилайло Тугалова.

Фото: «Дарё» / Гулилайло Тугалова

Туман ҳокимлиги ахборот хизмати раҳбарининг қўшимча қилишича, айни шу куни туман марказида яшовчи Аҳмедовлар оиласида ҳам икки нафар эгизак — Фотима ва Ҳусан исмли чақалоқлар дунёга келган.

Эслатиб ўтамиз, Ўзбекистонда 2021 йилнинг январь—ноябрь ойларида 16 минг 822 нафар эгизак чақалоқ туғилган.

2021 йил 1 декабрь ҳолатига кўра, Ўзбекистонда 832,4 минг туғилиш қайд этилган. Ноябрь ойининг ўзида эса республикада жами 79 213 та чақалоқ туғилган.

Давлат статистика қўмитаси маълумотларига кўра, Ўзбекистонда 10 йил давомида уч нафар эгизаклар туғилиши 4 бараварга кўпайди. 2021 йилнинг биринчи ярмида эгизаклар сони бўйича Самарқанд вилояти етакчи бўлган.