Голливуд юлдузи ва БМТнинг қочоқлар иши бўйича Олий комиссарининг махсус элчиси Анжелина Жоли афғонларга оид маълумотларни эълон қилиб бориш мақсадида Instagram’да саҳифа очди, деб хабар беради «Korrespondent.net».
«Айни вақтда Афғонистон халқи ижтимоий тармоқларда эркин мулоқот қилиш ва фикр билдириш имкониятини йўқотмоқда. Шу сабабли мен Instagram’га уларнинг тарихи ва бутун дунё бўйлаб асосий инсон ҳуқуқлари учун курашаётган инсонлар овози билан бўлишиш мақсадида келдим», — деб ёзади актриса.
Жоли «Толибон» ҳаракатининг ҳокимиятга келиши билан жамият ҳаётида юз берган ўзгаришлар ҳақида сўз борувчи афғон қизининг хатини эълон қилган.
Қизнинг сўзларига кўра, олдинлари афғон аёллари ўз ҳуқуқларини очиқча талаб қила олган, ишлаган ва ўқиган, энди эса жамиятни қўрқув эгаллаган.
Жоли мазкур ҳолатга бефарқ бўлмаган барчани Афғонистон халқига ҳар томонлама ёрдам кўрсатишга чақирган. Жолининг ижтимоий тармоқдаги аккаунтига ҳозирда 4 миллиондан ортиқ одам обуна бўлган.
Аввалроқ «Толибон» Афғонистонни эгаллаб олгач, матбуот ва аёллар учун ўз шартларини эълон қилганди, шунингдек, «Толибон» аёллар ҳуқуқларига шариат доирасида амал қилишга ваъда берган.
Изоҳ (0)