Коронавирус сабаб аҳволи оғирлашган россиялик хонанда МакSимни комадан чиқариб бўлмаяпти

Коронавирус сабаб шифохонага ётқизилган хонанда МакSимни шифокорлар комадан чиқаришга уриниб кўрди.

МакSим тахаллуси билан ижод қиладиган Марина Максимованинг саломатлиги билан боғлиқ турли миш-мишлар тарқалмоқда. Хонанданинг пиар-директори унинг аҳволи яхшиланаётганини таъкидлаётган бир вақтда, дўстлари буни инкор қилмоқда.

Шифокорлар у уланган ЭКМО — экстракорпорал мембранали оксигенация аппарати (юрак ва ўпкалар ўз фаолиятини бажара олмайдиган даражада хаста бўлса, беморнинг ҳаёти ва организмини вақтинча қўллаб-қувватлаш мақсадида амалга ошириладиган махсус даволаш усули)ни ўчиришга ҳаракат қилган, аммо бу иш бермаган. Мустақил равишда нафас ололмаган Маринани қайта аппаратга улашга мажбур бўлишган. Ўпкалари шу даражада кўп (80 фоиз) зарарланганидан хонанда мустақил нафас олишга кучи етмаган. МакSим ётган шифохонада ишлайдиган инсайдернинг айтишича, хонанда айни вақтда сопор (чуқур уйқу, субкома: бунда беморни фақатгина ташқи таъсирлар билан уйғотиш мумкин бўлади) ҳолатида.

Айни вақтда аҳволи оғир бўлишига қарамай, хонанданинг яқин дўстлари ва мухлислари унинг тузалиб кетишидан умидини узмаган.

Эслатиб ўтамиз, 2021 йилнинг 15 июнь куни шифохонага ётқизилган Маринанинг аҳволи ёмонлашгани туфайли унга сунъий нафас олиш аппарати уланган. Кейинроқ, яна бир оғир касаллик аниқланган ижодкорнинг аҳволи ёмонлаши сабаби нима билан боғлиқ экани ҳақида хабар берилган.