Тадбиркорлар Тошкентда реклама конструкцияларининг ноқонуний бузилишини тўхтатишни сўраб Президент Шавкат Мирзиёевга мурожаат йўллади. Пойтахтда Президентни ушбу вазиятни ҳал этишга чақирувчи бир нечта реклама баннерлари пайдо бўлган, деб ёзади «Подробно».
Фото: Telegram / «Ша всё будет»
«Ушбу реклама қурилмаси фақат суд қарори асосида демонтаж қилиниши мумкин. Ҳурматли Президентимиз, бизга ёрдам беринг», — дейилади реклама баннерларида.
Фото: Telegram / «Ша всё будет»
Эслатиб ўтамиз, Тошкент шаҳрида 8 апрелдан бошлаб реклама конструкцияларини оммавий бузиб ташлаш ишлари амалга оширилмоқда. Ташқи реклама объектларининг эгалари конструкциялар қонун бўйича ўрнатилгани, «снос» бўйича кўрсатма «юқоридан» бўлганини маълум қилган. Тадбиркорлар ҳозирга қадар 300 дан ортиқ баннерларни олиб ташлаган ҳукуматнинг ҳаракатини ноқонуний деб атаб, бу борада тушунтириш талаб қилмоқда.
Савдо-саноат палатаси реклама баннерлари нима сабабдан бузилаётганига ойдинлик киритиш мақсадида Тошкент ҳокимлигига сўров юборди. Монополияга қарши курашиш қўмитаси Тошкент шаҳрида жойлашган 6630 та конструкциянинг 3207 таси ёки 50 фоизга яқинида камчилик аниқланганини маълум қилди.
Апрель охирларида Тошкент шаҳар ҳокими ўринбосари Фурқат Маҳмудхўжаев ҳуқуқ-тартибот идоралари пойтахтда ноқонуний реклама конструкциялари пайдо бўлгани, лекин бунга ҳеч ким эътибор бермаганига ҳуқуқий баҳо бериши кераклигини айтганди.
