Қирғизистон президенти Хавфсизлик кенгашига янги котиб тайинлади

Қирғизистон президенти Садир Жапаров Марат Иманкуловни Хавфсизлик кенгашининг янги котиби этиб тайинлади, деб ёзмоқда «ТАСС».

«Президент Садир Жапаров Иманкуловни Қирғизистон республикасининг Хавфсизлик кенгаши котиби этиб тайинлашни кўзда тутувчи фармонни имзолади», — дейилади хабарда.

Матбуот хизматининг хабарига кўра, 8 май куни мамлакат президенти яна бир фармон билан Хавфсизлик кенгашининг собиқ котиби Рискелди Мусаевни вазифасидан озод қилди.

Расмий маълумотларга кўра, шу пайтгача Иманкулов ШҲТ Минтақавий аксилтеррор тузилмасининг кенгашида Қирғизистон вакили бўлган. 2007—2010 йилларда у МДҲнинг Терроризмга қарши кураш маркази раҳбарининг ўринбосари лавозимида фаолият юритган. 2010 йил тўрт ой давомида Қирғизистон Хавфсизлик кенгашининг котиби вазифасини бажарган.

Аввалроқ Жапаров қозоғистонлик тадбиркор ва саноатчи Алмаз Ибрагимовни ўзининг кўнгилли маслаҳатчиси этиб тайинлаган эди. Алмаз Ибрагимов Қирғизистоннинг Иссиқкўл вилоятида туғилган, узоқ йиллар давомида у Қозоғистондаги йирик саноат корхоналарининг топ-менежери бўлган.

Шунингдек, президент апрель ойидаги референдум натижалари бўйича қабул қилинган тузатишларни инобатга олган ҳолда мамлакат конституциясининг янги таҳририни имзолади ва янги конституция 1 июлдан кучга кириши мумкинлигини айтди.

Шундан кейин, Жапаров давлат ва ҳукумат таркибини президент маъмуриятига қайта ўзгартириш бўйича фармонни имзолади. Бундан буён Вазирлар Маҳкамасининг тузилмаси ва унинг фаолияти бўйича жавобгарликни президент ўз зиммасига олади, президент маъмуриятининг раҳбари эса Вазирлар Маҳкамасини бошқаради. Ҳужжат парламент аъзолари сонини 120 тадан 90 тагача камайтиришни назарда тутади.