Биткоин асосчиси дунёнинг энг бой одамлари қаторига қўшилди

Биткоиннинг аноним асосчиси дунёнинг энг бой одамларидан бирига айланди. Бу ҳақда Tengrinews хабар берди.

Турли ҳисоб-китобларга кўра, 750 мингдан 1,1 миллионгача криптовалюта тангаларига эгалик қилувчи, Сатоси Накамото тахаллуси билан танилган биткоин асосчисининг бойлиги 61 миллиард долларга етди.

Forbes рейтингига кўра, Майкл Блумберг, Роб ва Жим Уолтонларни ортда қолдирган Накамото дунёнинг 20 нафар энг бой одамлари рўйхатига кирди.

Муаммо шундаки, Сатоси Накамотонинг кимлигини ҳеч ким билмайди. Бу ном биткоин криптовалютасининг протоколини ишлаб чиққан ва дастурий таъминотнинг биринчи версиясини яратган одамнинг ёки гуруҳнинг тахаллуси.

Ушбу ном ортида турган ҳақиқий шахсни ёки гуруҳни аниқлашга бир неча бор уринишлар бўлган. Лекин уларнинг ҳеч бири натижа бермаган. Фақатгина Накамото дунёдаги биткоинларнинг беш фоизига эгалик қилиши маълум.

Қиймати биринчи марта 64 минг доллардан ошиб, тарихий рекордни янгилаганидан сўнг биткоиннинг нархи ўсишда давом этмоқда.

3 март кунги савдолар чоғида биткоин нархи биринчи марта 60 минг доллардан ошган эди. 2 январь куни биткоин курси 32 минг долларлик чегарадан ўтиб, савдо сессияси давомида биткоин қиймати 32 700 долларни ташкил этган. Декабрь ўрталарида биткоин нархи 5 минг долларга ошган эди. 16 декабрь куни криптовалюта қиймати биринчи бор бир суткада 12 фоизга қимматлашиб, 20 минглик чегарадан ўтиб кетган. 21 декабрь куни биткоин курси 24 минг доллардан ошган, кейинги бир неча кун давомида эса 24,6 минг долларлик оралиқда сақланган. 26 декабрь куни эса биткоин нархи биринчи бор 25 минг доллардан ошиб кетганди.