Tesla электромобиль компаниясининг инвестори компаниянинг асосчиси ва бош директори ва директорлар кенгаши устидан Делавер штати судига шикоят аризаси киритди. Бу ҳақда Bloomberg нашрига таяниб, Meduza хабар берди.
Даъво Илон Маскнинг Twitter ижтимоий тармоғидаги, инвесторнинг фикрига кўра, компанияни миллиардлаб долларлик хавф-хатарга дучор қиладиган «тартибсиз» постлари сабабли киритилди. Инвесторнинг айтишича, Маск ўзининг твитлари орқали 2018 йилда АҚШнинг қимматли қоғозлар бўйича комиссияси (SEC) билан тузилган шартнома шартларини бузмоқда. Унга кўра, Маск биринчи навбатда ижтимоий тармоқларда ўз ҳаракатларини мувофиқлаштириши керак.
Даъвогарнинг фикрига кўра, Маскнинг кейинги назоратсиз твитлари «компаниянинг молиявий ҳолатига жиддий таъсир қилиши» ва компанияда Маскка қарши туриши ҳамда инвесторларни ҳимоя қилиши керак бўлган одамларнинг овозини «босиб қўйиши» мумкин. Даъвогар Tesla’нинг директорлар кенгашини унинг аъзолари Маскнинг SEC битими шартларини бир неча бор бузганига қарамай, унинг интернетдаги хатти-ҳаракатларини жиловлай олмаганликда айблади.
Даъвогар мисол сифатида Маскнинг 2020 йил 1 майдаги твитини келтирди. «Tesla акцияларининг нархи, менимча, жуда баланд», — деб ёзган тадбиркор. Шундан кейин компания акцияларида бир кун ичида 15 миллиард доллар тушиш кузатилган.
Аввалроқ Tesla компанияси 2020 йилнинг тўртинчи чорагида 270 миллион, йил давомида эса жами 721 миллион доллар соф фойда кўрганини маълум қилган эди.
Изоҳ (0)