LG компанияси қувватлантириш станциясига уланганида ичидаги чиқиндилар автоматик равишда тозаланадиган симсиз чангютгични тақдим этди, деб хабар беради Hi-Tech.Mail.ru.
LG’нинг CordZeroThinQ А9 Kompressor Plus номини олган чангютгичи симсиз қурилмалар синфига киради — унинг ичига аккумулятор ўрнатилган бўлиб, у розеткага уланмаган ҳолда ишлай олади. Бироқ асосий жиҳати бу эмас.
LG дунёда биринчи бўлиб чангютгич контейнеридаги чиқиндилар автоматик тозаланишини таъминловчи тизимни тақдим этди — бунинг учун қувватлантириш учун док-станция ўрнатиш лозим. Албатта, вақт ўтиши билан станциянинг ўзида тўпланган чиқиндилар қопини бўшатиш керак, бироқ бу жуда камдан кам ҳолларда амалга оширишни талаб этади.
Samsung ҳам ўз чангютгичлари учун шу каби станцияни сотади, бироқ бунинг учун чиқинди контейнерини қўлда ечиш ва «подставка» ўрнатиш керак — 200 доллар нима сабабдан тўлаш кераклиги тушунарсиз. LG’да эса барчаси мустақил ишлайди.
Ягона жиҳати, LG ҳозирча ўзини ўзи тозалашга қодир чангютгич ва док-станция нархини эълон қилмаган. Мазкур янгиликка оид батафсил маълумотлар 11 январь куни бошланадиган CES 2021 кўргазмасида маълум қилинади.
Изоҳ (0)