Самарқанд вилоятининг Каттақўрғон туманида 9 туп чинор дарахтини ўзбошимчалик билан кесган фуқаро табиатга етказилган зарар учун 274 миллион 290 минг сўм жарима тўлади, дея хабар берди «Дарё» мухбири.
Самарқанд вилоят Экология ва атроф-муҳитни муҳофаза қилиш бошқармаси ахборот хизматининг аниқлик киритишича, Каттақўрғон тумани «Мелихўжа» МФЙнинг Энамяхши қишлоғида яшовчи фуқаро У.З. 2019 йилнинг декабрь ойида рухсатсиз Равот қишлоғида жойлашган «Гранд транс» ММТП ҳисобида бўлган дала шийпони атрофида жойлашган 9 туп чинор дарахтини кесиб ташлаган.
Бу ҳолат Каттақўрғон туман Экология ва атроф-муҳитни муҳофаза қилиш инспекцияси давлат инспекторлари томонидан 2020 йилнинг 30 январь кунида аниқланиб, қонунда белгиланган тартибда расмийлаштирилган.
2020 йилнинг 22 октябрь куни Жиноят ишлари бўйича Каттақўрғон туман судининг очиқ сайёр судида айбланувчи У.З. Жиноят кодексининг 198-моддаси 2-қисмида назарда тутилган (ўрмонларни, дарахтларни ёки бошқа ўсимликларни қонунга хилоф равишда кесиш кўп миқдорда зарар етказилишига сабаб бўлган бўлса) жиноятни содир этганликда айбли деб топилиб, унга нисбатан 2 йил 6 ой муддатга озодликни чеклаш жазоси тайинланган. Жазони ўз яшаш жойида ўташи белгиланган.
Шунингдек, 10 ой муддатда Самарқанд вилоят Экология ва атроф-муҳитни муҳофаза қилиш бошқармаси ҳисобига табиатга етказилган 274 миллион 290 минг сўм моддий зарар ундирилиши белгиланган бўлиб, ҳозирда туман мажбурий ижро бўлими ҳамкорлигида моддий зарарни ундириш ишлари амалга оширилмоқда.
Изоҳ (0)