Тошкент вилоятининг Оҳангарон туманида юк бўлимида 6768 қути пиротехника воситалари олиб кетаётган Hyundai аниқланди, дея хабар бермоқда ЙҲХББ ахборот хизмати «Дарё»га.
Маълум қилинишича, Тошкент вилоятининг Оҳангарон туманида жойлашган «Чинор» мунтазам йўл-патруль хизмати масканида хизмат ўтаётган йўл-патруль хизмати инспекторлари тунги соат 02:00 атрофида Фарғона водийсидан Тошкент томон ҳаракатланиб келаётган, ҳайдовчи Содирбек Қодиров бошқарувидаги Hyundai русумли, давлат рақам белгиси 50 V 421 НА бўлган транспорт воситасини тўхтатади.
Текширув вақтида автомашина юкхонасида ҳеч қандай тегишли ҳужжатлари бўлмаган 6768 қути пиротехника воситалари топилди. Улар Охангарон туман ИИБга топширилди. Таъкидланишича, ҳайдовчига нисбатан тегишли тартибда чора кўрилади.
Маълумот учун, пиротехника воситаларини сақлаш, ишлаб чиқиш, ташиш, жўнатиш, фойдаланиш, мамлакат ҳудудига ноқонуний йўллар билан олиб кириш, олиб чиқиш ёки ўтказиш билан шуғулланган шахсларга нисбатан Маъмурий жавобгарлик тўғрисидаги кодексининг 185-1-моддасига асосан ҳуқуқбузарлик ашёлари мусодара қилиниб, базавий ҳисоблаш миқдорининг 5 баробаридан 20 баробаригача жарима солинади.
Аввалроқ Тошкент вилоятида ноқонуний пиротехника ва дори воситалари ушлаб қолингани, Самарқанд шаҳрида пиротехника воситаларига боғлиқ ноқонуний ҳолатлар олдини олиш мақсадида тезкор тадбир ўтказилгани ҳамда Фарғонада Mercedes-Benz’да олиб кетилаётган 38 миллион сўмлик пиротехника воситалари тўхтатиб қолингани ҳақида хабар берилганди.
Изоҳ (0)