Фото: Парижда полициячиларни суратга олишни тақиқловчи қонун лойиҳасига қарши намойиш тартибсизликка айланиб кетди

Париж ва Франциянинг бошқа шаҳарларида «Глобал хавфсизлик тўғрисида»ги қонун лойиҳасига қарши минглаб кишилар иштирокидаги намойишлар бўлиб ўтди. Ушбу қонуннинг 24-моддасида полиция ходимларига зарар етказиш мақсадида уларнинг суратларини ёки видеоларини тарқатганлик учун 45 минг евро ва бир йил қамоқ жазоси кўзда тутилган. Қоидани бузганлар 45 минг евро жаримага тортилиши ёки 1 йилгача қамалиши мумкин. Намойишчилар бу сўз эркинлигига қўпол тажовуз деган фикрда.

Қора танли продюсер Мишел Зеклернинг кўчада ниқобсиз юргани учун қўлга олинаётган пайтда полиция ходимлари томонидан калтаклаётгани акс этган видео интернет тармоғида пайдо бўлганидан сўнг қонун лойиҳасига қаршилик айниқса авж олди. Франция президенти Эммануэль Макрон полиция ходимларининг шафқатсизлигидан ҳайратдалигини билдирди.

Ушбу видео пайдо бўлишидан бир неча кун аввал мамлакат бош вазири Жан Кастекс 24-модда матнига ўзгариш киритишга ваъда берганига қарамай, (қонун лойиҳаси Сенат томонидан маъқулланиши, президент томонидан имзоланиши керак) Париждаги Эйфель минораси яқинидаги Трокадеро майдонида намойишга чиққан минглаб кишиларни полициячилар водомёт билан тарқатишга уринганди. Бундан ташқари, газ баллонлари ҳам ишга солинган.

Намойишчилар қўлларида «Ким бизни полициядан ҳимоя қилади?», «Полиция зўравонлигига чек қўйинг!», «Демократия бўғиляпти», деб ёзилган плакатларни тутиб олган. Кўпчилик нафақат ҳимоя ниқобларида, балки кўзларини боғич билан боғлаб, қўлларида очиқ кўз расмини ушлаб олган. Майдон марказидаги эркинлик, тенглик ва биродарлик рамзини англатувчи ҳайкал кўзига ҳам боғич бойлаб қўйишган. Намойишнинг аксарият қисми тинч ўтган, аммо намойишчиларнинг айрим гуруҳи полиция билан тўқнашган. Бу ҳолат машиналар ёқиб юборилиши, кўздан ёш оқизувчи газ қўлланилиши билан якунланган. Қуйида Meduza воқеа акс этган суратларни тақдим этди.