АҚШда 30 октябрь куни яна 100 мингдан ортиқ одамда коронавирус аниқланди. Бу ҳақда мамлакат соғлиқни сақлаш органлари маълумотларига таяниб, Reuters хабар берди.
Мамлакат бўйлаб 24 соат ичида 100 233 кишида COVID-19 тасдиқланган бўлиб, бу АҚШда шу вақтга қадар бир суткада қайд этилган максимал кўрсаткич ҳисобланади. Бундан олдинги рекорд 29 октябрь куни қайд этилганди — 91 248 киши.
Мазкур кўрсаткич пандемия бошланганидан буён бутун дунё мамлакатлари орасида кузатилган рекорд ҳисобланади. Бундан олдинги рекорд Ҳиндистонда сентябрь ойида қайд этилган. Ўшанда Ҳиндистонда бир суткада 97 894 киши коронавирусга чалинган.
Жонс Ҳопкинс университети маълумотларига кўра, АҚШда коронавирус билан касалланганларнинг умумий сони 9 миллион кишидан ошган. Уларнинг қарийб 230 минги COVID-19 қурбонига айланган, 3,5 миллиондан ортиқ одам соғайган.
Эслатиб ўтамиз, 23 октябрь куни АҚШ президенти Дональд Трамп коронавирусга қарши Америка вакцинаси тез орада пайдо бўлишини эълон қилганди.
Изоҳ (0)