Ўтган асрнинг 80—90 йилларида Болливуд юлдузлари машҳурлиги ва даромадидан қатъи назар суратга олиш майдончасида биргаликда ишлашга қарши бўлмаган. Шу туфайли ҳам уларнинг ҳамкорликда иштирок этган лойиҳалари машҳурликка эришган. Лекин ҳозирда бундай ҳолат кузатилмай қўйди, эндиликда юлдузлар ўзлари каби шуҳрат чўққисига эришган актёр ёки актрисалар билан биргаликда рол ижро этмайди. Шунинг учун ҳам режиссёрлар томонидан ўтказилган сўровномада ўзида энг кўп юлдузларни жамлаган замонавий фильмлар кўриб чиқилди.
«Гоҳи шодлик, гоҳи ғам» – 2001 йил
Каран Жоҳар режиссёрлигида Амитабҳ Баччан, Жая Баччан, Шоҳрух Хон, Кажол, Ритик Рошан ва Карина Капур иштирок этган фильм томошабинлар ёдида абадий сақланиб қолади. Болливуд киносаноатида энг маҳоратли ва машҳур актёрларнинг жамлаган бу каби фильм бошқа такрорланмаслиги ҳам мумкин. Айтганча, суратга олиш майдончасида Шоҳрух Хон, Амитабҳ Баччан ва Карина Капур ўртасида келишмовчилик бўлганлиги ҳақида миш-мишлар тарқалган. Аммо фильм ҳинд киносанъатининг энг муваффақиятли картинаси сифатида тан олинади. Шунингдек, 2001 йилнинг декабрь ойидан буён Болливуднинг энг қиммат фильми ҳисобланади.
«Ҳақиқуй туйғулар» – 2006 йил
Ушбу фильмда Абҳишек Баччан, Ритик Рошан, Айшвария Рай, Удай Чопра ва Бипаша Басу каби юлдузлар бош ролларни ижро этган бўлса-да, қайсидир актёрнинг «порлаши» эвазига бошқа бири сояда қолиб кетишидан қўрқмаган. Фильм 2006 йилда энг кўп даромад келтирган ҳамда энг кассабоп фильмлар қаторидан жой олган.
«Қувноқ фирибгарлар» – 2010 йил
Режиссёр Рохит Шетти машҳур актёрлардан Митхун Чакраборти, Ажай Девган, Карина Капур, Аршад Варси, Тушсар Капур кабиларни фильмга таклиф этди. Фильм намойишидан сўнг бир қанча муаммолар пайдо бўлди. Сабаби томошабинлар масхара қилиб кўрсатилган дудуқланишни яхши қабул қила олмаган эди, чунки Ҳиндистонда миллионлаб болалар ва катталар шундай нуқсон билан дунёга келади.
Бундан ташқари, ҳинд дудуқланиш ташкилоти фильм режиссёри ва продусери устидан жамоат манфаатини кўзлаган ҳолда судга мурожаат қилди. Бироқ кўп ўтмай томошабинлар «фирибгарлар»нинг мухлисига айланди. Картина ўша йилиёқ Болливуднинг энг кўп даромад келтирган иккинчи фильмига айланди.
«Сиёсатчилар» – 2010 йил
Ажай Девган, Катрина Каиф, Нана Патекар, Ранбир Капур, Аржун Рампал ва Манож Бажпаи иштирок этган оиладаги жирканч сиёсат ҳақидаги воқеаларга асосланган фильм томошабинлар орасида катта муваффақиятга эришди. Шунингдек, актёрлар жамоаси танқидга ҳам учради. Дастлаб бадиий кенгаш ушбу фильм намойишини истамаган, сабаби Катрина Каиф ижро этган қаҳрамон − Конгресс партияси раҳбари Сония Ганди ҳақида шубҳали маълумотлар мавжуд эди. Аммо режиссёр барча айбловларни рад этиб, ягона илҳом манбаи – қадимги ҳинд эпоси «Махабҳорат» эканлигини маълум қилган. Фильм дунё бўйлаб 20 миллион АҚШ доллари ишлаб олишга муваффақ бўлди.
«Тўла уй» – 2010 йил
Акшай Кумар, Дипика Падуконе, Жия Хан, Лара Датта ва Боман Ирани каби машҳурлар иштирок этган комедия шунчалар муваффақиятга эришдики, кейинчалик ҳам унинг давоми суратга олинди. Гарчи танқидчилар бу фильмдан кўп нарсаларни кутган бўлса-да, мухлислар фильмни томоша қилишдан тўхтамади ва картина кассабоп фильмлар қаторидан жой олди.
«Уч савдойи» – 2009 йил
Комедияда Амир Хон, Мадхаван, Шарман Жоши, Карина Капур ва Боман Ирани иштирок этди. Фильмда акс этган талабалар дўстлиги аслида таълим тизимидаги нуқсонларни очишга хизмат қилади.
Комедия кўплаб мукофотларга сазовор бўлди. Filmfare Awards’дан олти маротаба, шунингдек, Японияда бўлиб ўтган Videoyasan Awards’нинг бош совринига эга бўлди.
«Уч савдойи» картинаси дунё бўйлаб ғалаба қозонди, айниқса, Осиё кассаларида 90 миллион доллар даромад топиб, рекордни янгилади. Шунингдек, 2017 йил Мексикада фильм ремейки суратга олинди.
Изоҳ (0)