Қорақалпоғистон ва Хоразмда Фавқулодда вазиятлар вазирлиги тизимида хизмат кўрсатувчи икки офицер коронавирус инфекцияси асоратлари оқибатида вафот этди. Бу ҳақда вазирлик матбуот хизмати томонидан эълон қилинган таъзияномада маълум қилинган.
Хабар беришларича, Хоразм вилояти Қўшкўпир тумани Фавқулодда вазиятлар бўлими бошлиғи майор Дониёр Жабборов 12 сентябрь куни, Қорақалпоғистоннинг Қўнғирот тумани Фавқулодда вазиятлар бўлими бошлиғи подполковник Куанишбай Акимов 14 сентябрь куни вафот этган. «Шу кунга қадар ушбу ходимларнинг коронавирус инфекцияси билан хасталаниб, шифохонага ётқизилганлиги маълум бўлган эди», — дейилади ФВВ ахборотида.
Маълумот учун, подполковник Куанишбай Акимов 1979 йил Нукус шаҳрида туғилган. У Қорақалпоғистон Ёнғин хавфсизлиги бошқармасида 20 йилдан ортиқ турли лавозимларда хизмат қилган эди. Майор Дониёр Жабборов эса 1981 йил Қўшкўпир туманида таваллуд топган; ФВВ тизимида 2005 йил апрель ойидан буён ишлаб келаётган эди.
«Юқорида номлари тилга олинган ходимлар, афсуски, кўринмас ёвга қарши курашиб, халқимизнинг тинчлиги ва фаровонлиги йўлида ўз хизмат бурчини бажариш чоғида ушбу касалликни юқтириб олган. Улар сўнгги нафасига қадар элу юрт манфаати йўлида садоқат билан хизмат қилиб, инсонларнинг тинч, хотиржам ва фаровон ҳаёти учун ширин жонларини аямади. Кўрсатган фидойиликлари ва матонати асло хотирамиздан ўчмайди», — дейилади ФВВ ахборотида.
Маълумот учун, коронавирус инфекцияси оқибатида юз бергани айтилаётган ушбу икки ўлим ҳолати ҳозирча Ўзбекистон Соғлиқни сақлаш вазирлиги томонидан тасдиқлангани йўқ. Умуман олганда, ҳозиргача коронавирус асоратлари оқибатида юз берган, бошқа давлат ва ҳокимият органлари томонидан эълон қилинган, бироқ ССВ томонидан тасдиқланмаган камида 14 та ўлим ҳолати мавжуд. Улар орасида июль ва август ойида маълум бўлган ҳолатлар ҳам бор, бироқ ССВ нима учун ушбу ҳолатлар юзасидан бирор изоҳ бермаётгани номаълум.
Изоҳ (0)