«Барселона» ва Лионель Месси атрофидаги вазиятга «Реал»нинг муносабати қандай эканлиги маълум бўлди

«Реал» Каталониянинг «Барселона» клуби ҳужумчиси Лионель Мессининг атрофидаги воқеаларга қандай муносабатда экани маълум бўлди.

Marca хабарига кўра, Мадридда ҳеч ким футболчини сотиб олиш ҳақида ўйламаган ҳам. Бир неча йил олдин ушбу вариант таклиф қилинган, аммо бу ёзда «Реал»нинг ягона мақсади — фақат ўз ўйинчиларини сотиш.

Таъкидланишича, Мадрид клуби аргентиналик футболчининг «Барселона»дан кетиши «Реал» учун яхши ҳолат эмас деб ҳисобламоқда, чунки каталонияликларнинг ҳозирда Месси учун тўлаётган 100 миллион евро тежаб қолинади, бу эса клубни қайта қуриш ишларини амалга оширишда катта ёрдам бериши мумкин.

Шу билан бирга «Реал» раҳбарияти Мессиниг клубни тарк этишига ишонмаяпти. Уларнинг фикрича, дунёнинг ҳеч қайси клуби уни сотиб олиш имкониятига эга эмас. Бундан ташқари, мадридликлар қандай қилиб футболчига даъво қилаётган клублар унга УЕФА томонидан белгиланган лимитдан ошмаган ҳолда «Барселона» каби пул тўлашини тушунмаяпти.

Қайд этиш жоиз, аввалроқ «Манчестер Сити» раҳбарияти аргентиналик футболчи трансфери учун 200 миллион евро ажратишга тайёрлиги ва унинг маълум қисми пул ва қолгани футболчилардан иборат бўлиши ҳақида хабар берилганди.