Ижтимоий тармоқларда 18 июнь куни номаълум шахс томонидан Malibu-2 автомобили ёқиб юборилгани акс этган видео тарқалди. Тошкент вилояти ИИББ автомобилни ёқиб юборган шахсни аниқлади.
Маълум қилинишича, Тошкент вилояти ва пойтахт ИИББ ходимлари томонидан ҳамкорликда олиб борилган тезкор суруштирув ишлари давомида Malibu-2’ни ёқиб юборганликда гумонланган ва унга алоқадор бўлган шахс аниқланди ва ушланди.
Аниқланишича, 2020 йилнинг 1 июнь куни Lessor cаr МЧЖ раҳбари Баҳодир Н. таниши 38 ёшли Улуғбек М.га давлат рақам белгиси 01 757 МDА бўлган Malibu-2 автомашинасини сотиб беришини сўраб, ундан 5 миллион сўм бошланғич бадал пули олган. Шундан сўнг 2 июнь куни Улуғбек М.нинг таниши Мирзо Улуғбек туманида вақтинча яшовчи, 1994 йилда туғилган гулистонлик З.Б. (аёл) Улуғбекдан шахсий иши учун мазкур автомашинани маълум муддатга сўраган. З.Б. машинани олиб кетиб, қайтариб олиб келмаган.
Тошкент вилояти ИИББнинг маълум қилишича, З.Б. 18 июнь куни соат тахминан 04:30 да Тошкент тумани «Файзобод» МФЙ ҳудудида жойлашган фермер хўжалиги дала майдони яқинида Lessor cаr МЧЖ балансидаги 2019 йилда ишлаб чиқарилган Malibu-2’ни ёқиб юборган.
Ҳозирда мазкур ҳолат юзасидан Тошкент тумани ИИБ томонидан фуқаро З.Б.га нисбатан Ўзбекистон Республикаси Жиноят кодексининг 173-моддаси (Мулкни қасддан нобуд қилиш ёки унга зарар етказиш) 2-қисми «в» банди, 227-моддаси (Ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш) 1-қисми билан жиноий иш қўзғатилган. Дастлабки тергов ҳаракатлари олиб борилмоқда.
Изоҳ (0)