Халтали бўри иштирокидаги сўнгги видео эълон қилинди. Бу жонивор 84 йил аввал қирилиб кетган

Халтали бўрилар ёки Тасмания йўлбарслари 84 йил аввал қирилиб кетган. Жаҳонда ушбу жонивор иштирокидаги 10 га яқин видеоёзув сақланган бўлиб, уларнинг тасвири уч дақиқадан ошмайди, деб ёзади Esquire.

Жониворнинг янги видеоси Австралия овоз ёзиш ва кино миллий архиви омборидан топилди. Кадрлар 4К форматига ўгирилди. Видеода Бенжамин лақабли халтали бўри қафас ичида безовталанаётганини кўриш мумкин.

Ролик 22 секунд давом этади, у Австралиянинг Бомарис ҳайвонот боғида Бенжамин ўлимидан 18 ой олдин олинган. Унинг ўлимидан сўнг, яъни 1936 йилнинг 7 сентябридан халтали бўрилар қирилиб кетди, деб ҳисоблана бошланди.

Халтали бўрилар инсонлар томонидан йўқ қилиб юборилган. Бундан ташқари, улар генетик хусусиятлари туфайли ҳам қирилиб кетган. 2011 йилда австралиялик олимлар халтали бўрилар динго ёввойи итлари сингари қўйларни овлай олмаган, деган хулосага келган. Гап шундаки, уларнинг жағлари катта ўлжани кўтара олмаган.