«Ҳаммаси номард булар. Бунақа номард милиция кўрмаганман. Бугун Мирзо Улуғбек трассасига қарайман, деди келган майор. Битта милиция, битта ‘ГАИ’ беринг дедим, биз эплолмай қолдик. ‘Хоп’ деди, бермади. ‘Участковой’ чиқмади. Тфу сенларга. Падар лаънати бўлдиларинг сизлар бугун. Халқ бирлашди, халқнинг ёнида турмадиларинг. Тфу ‘ГАИ’ларга, тфу милицияга. Халқ эшитсин, милиция клизма олмагунча умуман ишламайди. Ҳозир Каримовни даврида яшамаяпсанлар, ҳар куни клизма олгани. Шунчалик ҳам клизмага ўрганиб қоласанларми? Виждонан ишлашни ҳам ўрганинглар, соат неччи бўлди, ҳалиям ухлаяпсизлар?!
Уят борми, виждон борми? Халқ тўлаган солиқдан ойлик оляпсизлар! Нима қиляпсанлар? Ухлаяпсанлар», — дейди Юлдуз Усмонова ички ишлар ходимларига қарата.
Ушбу видео ижтимоий тармоқларда тарқалганидан кейин, одамлар хонанданинг ушбу қилмишини қоралаб, ички ишлар органлари ходимларининг ёнини олиб, видеога муносабат билдира бошлади.
«Юлдуз бўлса ўзига. Нима бу, оғзига қарамай гапираверади? Бунгаям қолганларга ўхшаб 15 суткалаб беришсин, кўрайлик судларига бориб, маза қилайлик. Кечирим сўрасин. Халқим, халқим, дейди олдига борсангиз бир тийинга илмайди», — дейди ижтимоий тармоқ фойдаланувчиларидан бири.
«Юлдузхоннинг санъатини яхши кўрадиганлар кўп, лекин бу иши билан халқнинг қаҳрига учрабди. Чунки бугунги кунда ички ишлар идоралари ходимлари ухламасдан, тинмасдан халқнинг хизматида, эрталабдан кечгача фидоий ишлаб турган пайтда бундай гапларни гапириш жуда катта гуноҳ қилиш билан баробар», — дейди халқ артистининг видеосига муносабат билдирган яна бир фуқаро.
«Охирги икки ой ичида ким карантинда турган бўлса ёнида милиция, ким касал бўлса ёнида милиция, кимни бирон жойга олиб бориш керак бўлса ёнида милиция, кўчада постда турган милиция, шунча кеча-ю кундуз хизматда бўлиб, уйма-уй юриб ҳол-аҳвол сўраган ички ишлар ходимларини ёмонга чиқаряпсанми? Сен кимсан, сенинг нима ҳаққинг бор милицияни беобрў қилишга? Шунинг учун ўзингни босиб юргин, милиция кўтарилса, кўчада бош кўтариб юра олмай қоласан, уйингдан чиқа олмай қоласан!» , — дейилади яна бир аудиомуносабатда.
Ўзбекистон Маданият вазирлиги ҳам видео бўйича расмий муносабат билдириб, Юлдуз Усмонованинг ҳаракатини қоралади.
«Юртимизга келган синовлар пайтида Юлдуз Усмонова томонидан билдирилган фикрлар ноўриндир, шунингдек, санъаткорнинг хабари бўлмаса керак, икки ой давомида ўз оиласи ва уйига бормаётган ички ишлар ходимлари ижтимоий тармоқларда нолишаётгани йўқ. Чунки, улар халқнинг тинчлиги йўлида кунни кун, тунни тун демай меҳнат қилишяпти.
Бир ишнинг ортидан ички ишлар ходимларини айблаш хато бўлса керак, эсланг, Юлдуз Усмонова ундан олдин ОАВлар орқали ички ишлар ходимларига миннатдорлик билдирган кунингизни. Энди, бир аччиқ гап билан уларга билдирган нафратингиз бу ниманинг далолати? Майли, аччиқ устида гапирилган гапларни ижтимоий тармоққа чиқаришингиз бу нимаси?
Бугун мамлакатимизда барча жам, яъни Ички ишлар органлари, Миллий гвардия, Фавқулодда вазиятлар ходимлари, шифокорларнинг заҳматкаш меҳнатини бугун ҳеч нарса билан тенглаштириб бўлмайди.
Юртимиздаги тинчлик ва осойишталик шукуҳини таъминлаб бераётган ички ишлар органлари, Миллий гвардия, Фавқулодда вазиятлар ходимлари ҳамда шифокорларга Маданият вазирлиги ўз миннатдорлигини билдиради», — дейилади вазирлик баёнотида.
Танқидий муносабатлардан сўнг Юлдуз Усмонованинг ички ишлар органлари ходимларидан узр сўрагани акс этган видеоси эълон қилинди.
«Ҳурматли ички ишлар, мудофаа, миллий гвардия, фавқулодда вазиятлар вазирлиги ходимлари, улуғ айём кунлари дилингизни оғритган бўлсам ҳаммангиздан узр сўрайман. Ҳаммамизда ҳам айб бор. Мен кўрганим учун гапирдим, Кўрганим, гапирганим учун узр сўрайман» — дейди хонанда ички ишлар ходимларига видеомурожаатида.
Изоҳ (0)