Рэпер Дрейк уйи интерьери ҳақида сўзлаб берди. У ухлайдиган матрас 400 минг доллар туради (фото)

Рэпер Дрейк Architectural Digest журналига ўз қасрини кўрсатди ва унинг интерьери ҳақида сўзлаб берди, деб ёзади Esquire.

Қўшиқчининг Торонтодаги 4600 квадрат метрлик уйида овоз ёзиш студияси, ёпиқ бассейн ҳамда мукофотлар учун алоҳида хона мавжуд.

Журнал ўқувчиларининг эътиборини энг кўп жалб этган нарса бу — Дрейкнинг каравоти бўлди. Маълум бўлишича, рэпер Hästens компанияси томонидан буюртма асосида ишлаб чиқарилган Grand Vividus моделидаги қарийб 400 минг долларлик матрасда ухлайди.

«Мен ётоқхонага ташқи оламдан дам олиш ва ҳордиқ чиқариш учун кираман. Каравотимда мен ўзимни сузаётгандек ҳис этаман», — дейди рэпер.

Швециянинг Hästens оилавий компанияси кўплаб машҳурлар учун каравот ва матраслар ишлаб чиқаради. Уларнинг нархи 15 минг доллардан бошланади.

Компания эгаси Линус Адольфссоннинг айтишича, ҳар бир матрас от толаси, жун, пахта ва зиғир каби табиий материаллардан ишлаб чиқарилган. Компания, шунингдек, ўз матрасларига бир йил мобайнида бир неча марта хизмат кўрсатади. Хизмат кўрсатиш нархи матрас нархининг ичида.

Grand Vividus моделидаги оддий матрас шундай кўринишга эга.

Дрейк учун эса рэпер уйининг интерьерини яратган дизайнер Феррис Рафаули билан бирга махсус матрас ишлаб чиқарилди.

Эслатиб ўтамиз, Дрейк 2018 йилда куйлаган In my feelings («Туйғуларимда») ёки Kiki, do you love me? («Кики, сен мени севасанми?») қўшиғи билан оламшумул машҳурликка эришди. Ижтимоий тармоқларда #kikichallenge хештеги остида юриб кетаётган машинадан сакраб тушиб, ушбу қўшиқ садолари остида рақсга тушиш ва уни видеога олиш оммалашди.

Ўзбекистонлик таниқли қўшиқчилар, хусусан, Юлдуз Усмонова ҳам ушбу челленжда иштирок этган, кейинроқ Дрейкнинг ушбу таронасини Шаҳриёр билан бирга куйлаган эди.