Ўзбекистон углеводород хом ашёси қазиб чиқаришни ошириш дастури доирасида Хитойнинг Ипак йўли жамғармаси ва хорижий тижорат банкларидан 250 миллион доллар миқдорида, шунингдек, экспорт кредит агентликларидан 400 миллион доллар миқдорида қарз маблағларини жалб қилади. Бу ҳақда «Нефть-газ тармоғининг молиявий барқарорлигини ошириш бўйича биринчи навбатдаги чора-тадбирлар тўғрисида»ги Президент қарорида белгилаб қўйилган.
Қарорда қайд этилишича, Молия вазирлиги ҳамда «Ўзбекнефтгаз» 2020 йилнинг 1 июнига қадар мазкур маблағлар жалб қилинишини таъминлаши керак.
Шунингдек, Молия вазирлиги белгиланган тартибда жалб қилинадиган 250 миллион доллар учун «Ўзбекнефтгаз»нинг Ипак йўли жамғармаси олдидаги мажбуриятлари бўйича давлат кафолатини бериш учун ваколатли орган этиб белгиланган.
Қарорга кўра, 2020 йил 1 сентябрга қадар Жаҳон банки ва Осиё тараққиёт банки экспертларини жалб қилган ҳолда Газ-транспорт тизимини 2030 йилгача ривожлантириш дастурининг бош режаси ишлаб чиқилиши керак.
Шунингдек, мазкур муддатга қадар барча иштирокчиларга тенг кириш имкониятини таъминлаш ва нархни шакллантиришнинг шаффоф механизмларини назарда тутган ҳолда электр энергияси ва табиий газнинг биржа савдолари асосидаги улгуржи бозорини яратиш бўйича таклифлар Вазирлар Маҳкамасига киритилиши белгиланган.
Қарорга кўра, Давлат активларини бошқариш агентлиги Энергетика вазирлиги ва Молия вазирлиги билан биргаликда халқаро даражада тан олинган консалтинг ва аудиторлик компанияларини жалб қилган ҳолда, 2020 йил 1 июлга қадар Нефть-газ тармоғи корхоналарининг операцион самарадорлигини яхшилаш бўйича «Йўл харитаси»ни ишлаб чиқиши ва тасдиқлаши керак.
Шу билан бирга, 2020 йил 1 октябрга қадар нефть-газ тармоғидаги барча корхоналарда коррупцияга қарши «комплаенс-назорат» тизими жорий этилиши лозим.
Қарорга кўра, 2020 йил 1 майдан бошлаб Аи-80 маркали автомобиль бензини ва дизель ёқилғиси, шу жумладан, ЭКО маркали дизель ёқилғисининг чакана нархларини давлат томонидан тартибга солиш бекор қилинади. Мазкур маҳсулотларни нефтни қайта ишлаш заводлари томонидан сотиш фақат биржа савдолари орқали амалга оширилади.
Изоҳ (0)