Карантин сабаб истасангиз ҳам, истамасангиз ҳам, кам ҳаракат қилиб кўп ўтиряпсиз, қоматингизда ўзгариш бўлаётгани ва оғирлашиб кетаётганингизни ҳис қиляпсизми? Унда қуйидаги тавсияларга амал қилиб аввалги ҳолингизга қайтиш ёки ундан-да яхшироқ бўлишга ҳаракат қилинг.
1. Янги Америка очмаган ҳолда барчага маълум, шу билан бирга чиндан ҳам қилиниши керак бўлган тавсия: кунингизни тонгги жисмоний тарбия билан бошланг. 5 дақиқа вақтингизни ажратинг, ва бир ҳафта ўзингизни мажбурланг, кейинги ҳафтадан қандай қилиб режимга тушиб қолганингизни ўзингиз ҳам билмай қоласиз.
2. Лифт ўрнига зинапоядан фойдаланинг, шароитингиз бўлса, велосипед ёки самокат учинг. У ҳам бўлмаса, 5 дақиқалик танаффус қилиб, рақсбоп қўшиқ қўйиб рақсга тушинг.
3. Уйдан туриб ишлашга мажбур бўляпсизми? Унда ора-орада туриб, ҳовли ёки уйингиз боғини айланиб келишни кундалик одат қилиб олинг, тоза ҳаводан нафас ҳам олиб туриш керак. Мияга кислород етишмаслиги, яъни гипоксиядан одам ўзини лоҳас ҳис қилади, ишга бўлган лаёқати камайиб, эснайвериши мумкин. Шундай экан уйда қамалиб ўтирмасдан ҳеч бўлмаганда хонангиз деразаларини очиб шамоллатинг ва ўпкангизни тўлдириб нафас олинг.
4. Умуртқа поғонасига ҳам осон эмас, кун бўйи гавда оғирлигини кўтариш етмагандек, компьютер ёки телевизор қаршисида букчайиб ўтирганингизда қандай аҳволда бўлишини тасаввур қиляпсизми? Фақат иш ёки ҳордиқ чиқаришни ўйламай, танангиз, хусусан, умуртқангиз ҳақида ҳам қайғуриб туринг, қаддингизни ростланг, дам олинг ва вақти-вақти билан турникка осилиб туринг. Иш ёки дарс столингизга «зудлик билан қаддингни тик тут-чи» деб ёзиб, таъсирчанликни ошириш учун қовоғини уйган смайл чизиб қўйинг.
5. Массаж ҳам жуда яхши фойда беради, ҳеч бўлмаганда елка ва бўйин қисмини уқалаб туриш керак.
6. Иш, оилавий ташвишлар, муаммолар асабийлашиш ва кайфият бузилишига сабаб бўлади, бу эса ҳар қандай касаллик, кўнгилсизликларни келтириб чиқаради. Шунинг учун энг асосийси, кунингизни тўғри тақсимлаш, вақтида иш, вақтида дам олиш ва ўз устингизда ишлашни унутманг. Дарвоқе, уйқунинг меъёрда бўлишига ҳам эътибор қаратинг.
Изоҳ (0)