Қозоғистон Миллий хавфсизлик қўмитаси ходимлари терактнинг олдини олди ва аҳоли гавжум жойларда портлашларни амалга оширмоқчи бўлган икки кишини ушлади. Бу ҳақда «ТАСС» хабар берди.
Маълум қилинишича, 14 февраль, жума куни, Қозоғистон Миллий хавфсизлик қўмитаси Олмаотада ўтказилган тезкор-қидирув тадбирлари натижасида диний оқимнинг икки тарафдорини қўлга олган.
Олиб борилган тергов ҳаракатлари давомида қўлга олинганларнинг яшаш жойидан совуқ қурол, портловчи мослама, уни тайёрлаш учун зарур қисмлар, портлатилиши режалаштирилган объектларнинг фотосуратлари ҳамда видеотасвирлари бўлган смартфонлар мусодара қилинган.
Қўлга олинганларга нисбатан терроризмни тарғиб қилиш ва террорчилик актига тайёргарлик ҳолатлари бўйича жиноий иш қўзғатилган.
Эслатиб ўтамиз, Ўзбекистон Ички ишлар вазирлиги ва Давлат хавфсизлик хизмати ходимлари томонидан Тошкентда 2019 йилнинг октябрь ойида ҳамда 2020 йилнинг бошида «Жиҳодчилар» диний-экстремистик оқимининг иккита гуруҳи қўлга олинган эди.
Изоҳ (0)