Косон туман халқ таълими бўлими раҳбари Соиб Давидов туман халқ таълими бўлимининг расмий сайти бор ёки йўқлигини билмади. Вилоят ҳокими матбуот котиби эса халқ таълими масъуллари ишини танқид қилди, дея хабар беради «Дарё» мухбири.
АОКА вилоят бошқармаси масъуллари, вилоят ҳокимлиги, халқ таълими бошқармаси ва журналистлар иштирокида бўлиб ўтган матбуот анжуманида мактабдаги бўш иш ўринлари ҳақида аниқ маълумотлар берилмаслиги айтилди.
Матбуот анжуманида сўз олган «Дарё» мухбири эса бўлим иш фаолияти ва бўш иш ўринлари ҳақида маълумот берувчи туман халқ таълими бўлимининг расмий сайти бор ёки йўқлиги билан қизиқди. Бўлим мудири Соиб Давидов «бўлимнинг расмий сайти бор», деди. Аммо сайт манзилини билмади.
Вилоят ҳокимлиги ахборот хизмати раҳбари Аҳрор Содиқов эса халқ таълими раҳбарларининг матбуот анжуманига тайёргарлигини танқид қилиб, ОАВ ходимлари томонидан берилаётган саволларга жавоб беришда аниқлик йўқлигини таъкидлади.
— Аниқ саволга аниқ жавоб йўқ, — деди Аҳрор Содиқов. — Фақат гапни айлантириш билан чекланяпсизлар.
Зоир Мирзаевнинг матбуот котибига кўра, қоғозда тайёрланган маълумотларни Косон туман халқ таълими бўлими раҳбари Соиб Давидовнинг ўзи ҳам билмайди.
Эслатиб ўтамиз, 28 январь, сешанба куни вилоят масъуллари билан бўлиб ўтган аппарат йиғилишида Зоир Мирзаев ҳам Косон халқ таълими фаолиятини танқид қилган.
Изоҳ (0)