Эроннинг Кирмон шаҳрида бўлиб ўтаётган генерал Қосим Сулаймонийнинг дафн маросими у билан видолашиш истагидагиларнинг ҳаддан ташқари кўплиги боис бошқа санага қолдирилди. Бу ҳақда, Пресс ТВ телеканалига асосланиб, «РИА Новости» агентлиги хабар бермоқда.
Сулаймонийнинг она шаҳри Кирмонда генерал билан видолашув 7 январь, сешанба куни бошланган эди. Кейинчалик мотам юриши давомида юз берган тиқилинч оқибатида 40 киши ҳалок бўлди ва 200 дан ортиқ одам тан жароҳати олгани маълум бўлди.
Пресс ТВ телеканалининг хабар беришича, Сулаймоний билан видолашув жараёни Кирмонда жуда катта оломон тўплангани боис қолдирилган. Қайд этишларича, шаҳарга «миллионлаб азадорлар йиғилган».Associated Press’нинг аниқлик киритишича, Теҳронда 6 январь куни бўлиб ўтган мотам юришида миллиондан ортиқ одам иштирок этган. 4 январь куни Бағдоднинг шиалар яшайдиган ҳудудида ҳам генерал билан видолашув бўлиб ўтган эди.
Генерал Қосим Сулаймоний 3 январь куни, АҚШ авиазарбаси оқибатида ҳалок бўлган эди. Пентагон баёнотига кўра, эронлик генерал АҚШ президентининг буйруғига кўра ўлдирилган — Трамп Сулаймонийни биринчи рақамли террорчи деб атаган эди.
Изоҳ (0)