Ўзбекистон Давлат активларини бошқариш агентлиги «Дарё»га Ucell алоқа операторининг юз фоиз давлат улушига эгалик қилаётгани ҳамда активлар Россиянинг «Мегафон» компаниясига сотилмаганини маълум қилди.
«Spot.uz» нашри Россиянинг «Мегафон» алоқа оператори билан боғланиб, Ucell’ни сотиб олиш билан боғлиқ маълумотларга аниқлик киритди. «Мегафон» матбуот хизмати вакили Юрий Нехайчик ОАВда тарқалган маълумотларга раддия билдириб, тарқалган хабарлар ҳақиқатан йироқда эканллигини маълум қилган.
Аввалроқ, Алишер Усмоновга тегишли «Мегафон» алоқа оператори Ucell’ни сотиб олгани ҳақида хабар берилганди.
Маълумот учун, Ucell Coscom бренди остида 1996 йилда ташкил этилган бўлиб, 2007 йилнинг июль ойидан TeliaSonera Coscom компаниясининг асосий акциядорига айланди. 2008 йилнинг июнь ойида Coscom оператори Ucell бренди остида фаолият бошлади. Бугунги кунга келиб, компания абонентлари сони 7,1 миллионни ташкил қилади. Ucell 1 йил муқаддам Telia’дан 215 миллион долларга Ўзбекистон Давлат рақобат қўмитаси томонидан сотиб олинганди.
