30 май куни Булунғур туманининг «Мингтепа» МФЙда яшовчи Зуҳра Умарова тан жароҳати олиб, туман тиббиёт бирлашмасига мурожаат қилган.
Аниқланишича, Зуҳра Умарова Қодиржон Ғаниев билан 2019 йилнинг 18 май куни никоҳдан ўтиб, турмуш қурган ва биргаликда яшаб келган. 30 май куни тунги соат 03:30 атрофида Қодиржон Ғаниев маст ҳолатда Булунғур тумани «Мингтепа» МФЙ «Тинчлик» қишлоғидаги яшаш уйида, оилавий келишмовчиликлар сабабли, турмуш ўртоғи Зуҳра Умаровани уриб, тан жароҳати етказган.
Туман тиббиёт бирлашмасининг 30 май кунидаги маълумотномасида Зуҳра Умаровага «бош мия чайқалиши, бошнинг ўнг тепа соҳасида урилиб, йиртилган жароҳат, иккала кўз атрофи ва бурун соҳаси лати» каби тан жароҳатлари мавжудлиги кўрсатилган.
– Ушбу ҳолат юзасидан Булунғур тумани ИИБ томонидан терговга қадар текширув ҳаракатлари олиб борилмоқда. Ҳолат юзасидан гувоҳлардан тушунтириш хати олиниб, ҳолатга ойдинлик киритилмоқда. Ҳозирда Қодиржон Ғаниев Самарқанд вилояти наркология диспансерига ётқизилган, — дейди Самарқанд вилоят ИИБ матбуот хизмати раҳбари Ширин Норматова. – Зуҳра Умарованинг тан жароҳатларини оғирлик даражасини аниқлаш учун сайёр тартибда судга оид тиббиёт экспертизаси тайинланган.
Зуҳра Умарова турмуш ўртоғи Қодиржон Ғаниевга қонуний чора кўришни сўраб ариза билан мурожаат қилмаслигини баён қилган. Ушбу ҳолат юзасидан холислар иштирокида тегишли тартибда далолатнома расмийлаштирилган, дейилади вилоят ИИБ матбуот хизмати хабарида.
Изоҳ (0)