Наманганда анъанавий «Гуллар байрами»га ҳозирлик кўрилмоқда

Наманганда 1961 йилдан буён ўтказиб келинаётган анъанавий «Гуллар байрами»га ҳозирлик кўрилмоқда.

Бу йил 59-маротаба ўтказилаётган ушбу байрам 26 майдан 1 июнга қадар давом этади. Уни 26 май куни гуллар билан безатилган 100 дан ошиқ автомобиллар карвони бошлаб беради.

Наманганга хос бўлган «Гуллар байрами»ни халқаро байрамга айлантириш борасидаги саъй-ҳаракатлар ўз самарасини бермоқда. Жумладан, ўтган йили байрамда иштирок этиш учун Жанубий Корея, Россия, Туркия, Голландия, Қирғизистон, Тожикистон, Қозоғистон, Туркманистон сингари кўплаб давлатлардан меҳмонлар келди.

Шу пайтгача байрамда асосан наманганлик гулчилар қатнашган бўлса, бу йил Тошкент, Фарғона, Андижон вилоятларидан ҳам 30 нафардан зиёд моҳир гулчи ўз кўргазмаси билан иштирок этиши кутилмоқда.

Байрамда 150 нафардан ортиқ гулчи-тадбиркор, 100 дан ортиқ корхона ва ташкилот томонидан гуллар кўргазмаси намойиш этилади. Ўтган йили байрамда гуллардан композициялар яратиш учун Бобур номидаги маданият ва истироҳат боғига 3,5 миллион туп гул кўчати экилган эди. Бу йил уларнинг сони 5 миллиондан ошиб кетди.