Фарғона вилояти ИИБ матбуот хизматининг «Дарё»га маълум қилишича, Боғдод тумани Самандарак қишлоғида яшовчи 10 нафар йигит Фарғона шаҳрида яшовчи танишлари У.Юнусов таклифи билан 28 январь куни Россиянинг Пенза шаҳрига қурилиш объектларида ишлаш учун борган. У ерда йигитларни У.Юнусовнинг укаси Т.Юнусов кутиб олиб, Роман исмли қурилиш объекти раҳбарининг қўлида ишлашларини, иш ҳақларини олишда ўзи ўртада туришини айтган. Йигитларнинг фуқаролик паспортларини эса вақтинчалик рўйхатга қўйдириш баҳонасида олиб қўйган.
Йигитларга ишга боришдан аввал 45–60 минг Россия рубли миқдорида иш ҳақи берилиши ваъда қилинган эди. Бироқ улар Пенза шаҳрига борганидан кейин иш ҳақини 38 минг рублдан берилиши, иш вақти ҳам олдиндан айтилгандай 8 соат эмас, 12–14 соат эканлиги маълум бўлган. Йигитлар бунга рози бўлмай, ишлаш учун бошқа жойга кетмоқчи бўлиб, фуқаролик паспортларини сўрашган. Аммо Т.Юнусов ҳамда Роман исмли иш берувчи турли баҳоналар билан 2 ой давомида уларга фуқаролик паспортларини бермай келган.
Йигитлар 2 ой давомида ишга чиқмай, иш ҳақи ҳам олмай, қарзга ботиб, яшаш манзилига қайтолмай, қийин аҳволда қолган ҳамда ота-оналари орқали вилоят ИИБдан ёрдам сўраган.
Фарғона вилояти ИИБ Терроризм ва экстремизмга қарши курашиш бошқармаси одам савдоси ва ноқонуний миграцияга қарши курашиш бўлими ходимларининг «Истиқболли авлод» маркази билан ҳамкорликда олиб борган саъй-ҳаракатлари натижасида йигитларнинг барчаси фуқаролик паспортларини олган ҳолда Ўзбекистонга қайтарилди.
Изоҳ (0)