Кеча, 13 апрель куни Мудофаа вазирлиги Тоифаланган объектларни қўриқлаш қўшинлари қўмондонлиги ҳарбий хизматчилари учун 40 хонадонга мўлжалланиб бунёд этилган кўп қаватли хизмат уйи тантанали топширилди. Бу ҳақда вазирлик матбуот хизмати «Дарё»га маълум қилди.
Давлат ва жамоат ташкилотлари вакиллари, ҳарбий хизматчилар ва уларнинг оила аъзолари, фахрийлар, ёшлар иштирокида ўтган тадбирда айниқса, кейинги йилларда Ўзбекистон армияси жанговар салоҳиятини юксалтириш, ҳарбий хизматчиларнинг хизмат ва яшаш шароитини яхшилаш борасида кенг кўламли ишлар амалга оширилаётгани, хусусан, ҳарбий хизматчилар ва уларнинг оила аъзоларини қўллаб-қувватлашга алоҳида эътибор қаратилаётгани таъкидланди.
«Оҳирги 2 йилда ҳарбий хизматчиларнинг ижтимоий ҳимоясига давлатимиз раҳбарияти томонидан катта эътибор қаратилмоқда. Хусусан, 2017- ва 2018 йилларнинг давлат дастурлари бўйича 4,5 минг нафар ҳарбий хизматчининг яшаш шароитлари яхшиланди. Бу илгари 15 йилда ҳам эришилмаган натижа», — дейилади хабарда.
Тантанали маросимда иштирок этган мудофаа вазири генерал-майор Баҳодир Қурбонов шинам ва кўркам, барча қулайликларга эга уй соҳиб ва соҳибаларини табриклади. Хонадонларга кириб, уларнинг яшаш шароити билан яқиндан танишди. Ҳарбий хизматчиларнинг оила аъзолари билан самимий суҳбатда бўлди.
Қуролли Кучлар Марказий ашула ва рақс ансамбли ҳамда Мудофаа вазирлиги Марказий ҳарбий оркестри томонидан ижро этилган дилрабо куй ва қўшиқлар шодиёнага ўзгача руҳ бағишлади. Шу куни дошқозонларда миллий таомлар ва сумалак қайнади.
Изоҳ (0)