Сурхондарёда пул маблағларини ноқонуний яшириш ҳолатлари аниқланди

Сурхондарё вилояти давлат солиқ хизмати органлари томонидан жорий йилда тадбиркорлик субъектларида ўтказилган 308 та хронометраж кўздан кечириш тадбирлари давомида бир кунлик тушум бир ҳафта олдинги мос даврдаги тушумга нисбатан 569 миллион 492 минг сўмга ошганлиги аниқланган. Бу ҳақда Сурхондарё вилояти давлат солиқ бошқармаси Жамоатчилик билан алоқалар ва ҳуқуқий ахборот шўъбаси хабар берди.

Бундан ташқари, 279 нафар фуқаро норасмий фаолият олиб бораётгани маълум бўлган.

Шўрчи туманида фаолият кўрсатиб келаётган 7 та тадбиркорлик субъектларида ўтказилган хронометраж кўздан кечириш тадбирлари натижасида кунлик тушум ўтган ҳафтанинг мос давридаги тушумга нисбатан 40 миллион 440 минг сўмга ошган.

Шунингдек, мазкур тадбиркорлик субъектларида жами 14 нафар ишчи-ходим норасмий тарзда фаолият юритиб келаётганлиги аниқланган.

Мисол учун, ушбу туманда фаолият кўрсатиб келаётган «Захро Камола» масъулияти чекланган жамиятига қарашли умумий овқатланиш шохобчасида ўтказилган хронометраж кўздан кечириш тадбири давомида уч кунлик тушум ўтган ҳафтанинг мос кунларидаги тушумга нисбатан 17 миллион 787 минг сўмга ёки 5 баробарга ошган.

Бундан кўриниб турибдики, тадбиркорларни ҳар томонлама қўллаб-қувватлаш борасида олиб борилаётган изчил ислоҳотларга қарамай, айрим тадбиркорларнинг нақд пулни яшириш, савдо тушумини камайтириб кўрсатиш ва норасмий тарзда ишчи-ходимларни ёллаш каби ноқонуний ҳаракатларни амалга ошираётганлиги ачинарли ҳол, албатта.

Хронометраж кўздан кечириш бу – хронометраж ўтказиладиган даврда тушумларнинг ҳақиқий ҳажмларини, пул тушуми суммаларини, ишлаб чиқариш ҳажмларини, товарларни (ишларни, хизматларни) реализация қилиш ҳажмларини аниқлаш мақсадида амалга ошириладиган, товарларни (ишларни, хизматларни) ҳақиқий реализация ҳажмларини аниқлашга доир солиқ назоратининг шаклидир.

Пул тушумини, ишлаб чиқариш ҳажмларини ва товарларни (ишларни, хизматларни) реализация қилиш ҳажмларини хронометраж кўздан кечириш товарларни (ишларни, хизматларни) реализация қилувчи солиқ тўловчиларда, бевосита товарларни (ишларни, хизматларни) реализация қилиш жойида, маҳсулот ишлаб чиқариш цехларида, шунингдек ишларни бажариш ва хизматлар кўрсатиш жойларида ҳамда солиқ тўловчи даромадлар олиш учун фойдаланаётган ёхуд солиқ солиш объектларини сақлаш билан боғлиқ бошқа жойларда давлат солиқ хизмати органларининг мансабдор шахслари томонидан ўтказилади.

Хронометраж кўздан кечиришни ўтказиш муддати етти календар кундан ортиқ бўлмаслиги керак.