Россия бокс федерацияси бош котиби Умар Кремлев енгил вазн тоифасида UFC чемпиони Ҳабиб Нурмагомедовнинг америкалик боксчи Флойд Мейвезер билан ўтказилиши мумкин бўлган жангига изоҳ берди. Бу ҳақда «Спорт-Экспресс» нашри хабар беради.
Ташкилот бош котиби ушбу жангнинг Москвада ўтказилиши кераклиги ҳақида таъкидлаб ўтди.
«Агар Ҳабиб Мейвезер билан бокс йўналишида жанг қилишга розилик берса, биз учрашувнинг Москвадаги «Лужники» стадионида бўлиб ўтиши учун барча шароитларни яратамиз. Агар жанг ўтказилиши аниқ бўлса, бу нафақат биз учун, балки мамлакатимиз учун ҳам фойдали. Ўзингиз ўйлаб кўринг, чет элдан қанчадан қанча мухлислар оқими келади? Қанчалик кўп чет эл инвестицияси кириб келади? Ҳабиб ва Мейвезер жанги барча учун қизиқ»,— деди Кремлев.
У жанг нархини 1 миллиард долларга баҳолади.
«Ўйлашимча, ушбу жанг баҳоси миллиард доллар атрофида бўлади. Бунинг ичига харажатлар ҳам, даромад ҳам киради. Албатта, фойда кўрамиз, бунга шак-шубҳа йўқ. Менимча, Мейвезер ва Макгрегор ўртасида ўтказилган жангнинг ҳомийлари ҳам мазкур тўқнашувда иштирок этишни хоҳлайди. Ахир беллашув бутун дунёга тўғридан-тўғри эфирга узатилади»,—дея сўзларига якун ясади Кремлев.
Эслатиб ўтамиз, америкалик боксчи Нурмагомедов билан бокс қоидалари бўйича жанг қилишни хоҳлаётганди. Ҳабиб эса октагонда ҳамда рингда жанг қилишга қарши эмас.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)