Беларуснинг лойиҳалаш ва қурилиш ташкилотлари Ўзбекистонда атом электр станцияси (АЭС) қурилишида иштирок этмоқчи, деб ёзади Sputnik Ўзбекистондаги Беларусь элчиси Леонид Мариничга таяниб.
«Беларуслик мутахассислар нафақат Ўзбекистонда АЭС қурилишида бевосита қатнашишга, балки техника ва ускуналарни етказишни таъминлашга, консультатив кўмак беришга, кадрларни ўқитиш ва малакасини оширишга тайёр», — деди Маринич.
Дипломат таъкидлашича, беларуслик лойиҳалаш ва қурилиш ташкилотлари атом энергетика объектларини барпо этишда муайян тажриба орттирган. Хусусан, россиялик шериклар билан ҳамкорликда Беларусь АЭС қурилиши якунланмоқда — биринчи энергоблокни 2019, иккинчисини — 2020 йилда фойдаланишга топшириш режалаштирилмоқда.
Эслатиб ўтамиз, июль ойида Ўзбекистон Беларуснинг Гродно вилоятида атом электр станцияси қурилишидаги тажрибаси билан қизиқиб қолган ҳамда Бош вазир ўринбосари — «Ўзбекнефтегаз» АЖ бошқаруви раиси Алишер Султонов бошчилигидаги делегация Беларусь АЭС ахборот марказида бўлди ва бу ерда олиб борилаётган ишлар билан танишган эди.
Изоҳ (0)