Самарқанд шаҳридаги «Саховат» уйида мустақилликнинг 27 йиллик байрами муносабати билан маданий тадбир бўлиб ўтди. Самарқанд вилоят ҳокимлиги, вилоят соғлиқни сақлаш бошқармаси, маданият қўмитаси ва ҳомийлар ҳамкорлигида ташкил этилган байрам дастурида васийликка олинганлар, ёлғиз кексалар, нафақахўрлар ва ногиронлиги мавжуд шахслар иштирок этди. Бу ҳақида «Дарё» мухбири Фарҳод Норбўтаев хабар бермоқда.
Тадбирда сўзга чиққанлар мамлакатда аҳолининг ижтимоий муҳофазага муҳтож қатлами манфаатларини ҳимоя қилиш, уларга кўрсатилаётган тиббий хизмат сифатини янада юксалтириш борасида кенг кўламли ишлар амалга оширилаётганини алоҳида таъкидлаб ўтди. Бундай хайрли ишларга жамоат ташкилотлари ҳам фаол иштирок этиб, ишчи-хизматчилар ва уларнинг оила аъзолари, кексалар, ногиронларга моддий ва маънавий кўмак кўрсатаётганлиги қувонарли эканлиги билдирилди.
— Ўзим ўқитувчи бўлиб ишлаганман. 14 йилдан буён «Саховат» уйида яшайман. Бу ердаги ходимларнинг бизга бўлган меҳри бўлакча. Уларнинг ҳаммаси ўз фарзандимдек бўлиб қолган, — дейди Чори бобо Бўронов. — Ҳукуматимизнинг биз кексаларга қаратаётган юксак ғамхўрлигидан жуда ҳам мамнунмиз. Ҳар байрамда мана шундай байрам тадбирларини ташкиллаштириб, кўнглимизни кўтаради. Бунинг учун ташкилотчиларга миннатдорчилигимни билдираман.
«Саховат» уйида истиқомат қилаётган кексалар байрам дастурхони атрофида дилдан суҳбатлашди. Вилоятда фаолият юритувчи санъаткорларнинг куй-қўшиқларига завқ билан рақсга тушди.
– Муассасамизда мунтазам равишда байрам тадбирлари, маданий кечалар ўтказиб келинади. Бу йилги мустақиллик байрами ҳам ҳомийлар томонидан юқори савияда ташкиллаштирилди, – дейди «Саховат» уйи раҳбари Сайёра Жаватова. – Йил давомида турли ташкилотлар вакиллари, саховатли кишилар келиб, кексаларимиз учун маданий тадбирлар ташкил этиб келмоқда. Бугунги байрам дастурхони атрофида ҳам нуронийларимиз кўтарингки кайфият билан яхши ҳордиқ чиқаришди.
— Айни пайтда мазкур муассасада 131 нафар васийликка олинганлар, ёлғиз кексалар, нафақахўрлар ва ногиронлиги мавжуд шахсларга 8 нафар шифокор, 28 нафар ҳамшира ва 34 нафар ўрта тиббиёт ходимлари хизмат қилиб келмоқда, — дейди вилоят соғлиқни сақлаш бошқармаси бўлим бошлиғи Илҳом Ваҳобов. - Нуронийларимизга янада қулай шарт-шароит яратиб бериш мақсадида 50 ўринли, шунингдек 25 ўринли ётоқдаги аҳволи оғир фуқаролар учун янги бино қурилмоқда. Ушбу бино 2019 йилда фойдаланишга топшириш режалаштирилган. Қолаверса, ҳозирда 10 миллион сўм маблағ эвазига 2 та ҳаммом қурилмоқда. Шунингдек, 6 йилдан бери ишламай келган лифт қайта таъмирланди.
— Мен 58 ёшга кирдим. 13 йилдан буён шу ерда яшайман. Муассаса барча шарт-шароитлар яратилган, — дейди Рустам бобо Мамиров. — Шифокорлар мунтазам равишда ҳолимдан хабар олиб, зарур муолажаларни амалга оширади. Уларга ўз миннатдорчилигимни билдираман.
Маълумот учун, Самарқанд вилоят ҳокими вазифасини бажарувчи Эркинжон Турдимов июль ойи охирида мазкур муассаса фаолияти билан танишиб, бу ерда олиб борилаётган ишлар мутлақо қониқарсиз эканлигини билдириб ўтганди.
Хусусан, муассаса ҳудудида ободонлаштириш ишлари ўз ҳолига ташлаб қўйилган. Бино атрофи қаровсиз, ичидаги манзара унданда аянчли: лифт ишламайди, хоналар димиққан, ювиниш хоналари тозалик талабларига жавоб бермайди, ҳожатхоналардаги антисанитария ҳолати ачинарли ҳолда бўлган.
«Саховат» уйи фаолиятини қисқа муддатли ўрганиш жараёнида тегишли назорат органлари томонидан катта миқдордаги молиявий камомадлар борлиги аниқланган.
Иш берувчининг ташаббуси билан муассаса раҳбари Толиб Саидов эгаллаб турган вазифасидан озод қилинганди.
Вилоят ҳокими вазифасини бажарувчи Эркинжон Турдимов мавжуд муаммоларни зудлик билан бартараф этиш юзасидан мутасаддиларга тегишли топшириқлар берган эди.
Изоҳ (0)