Наманганда «китоб қаҳвахонлари» фаолияти йўлга қўйилади

Намангандаги «Ёшлар маркази»да «Маърифат китоб олами» хайрия жамоат фондининг тақдимоти бўлиб ўтди. Бу ҳақда «Дарё» мухбири хабар бермоқда.

Вилоят зиёлилари, талабалар, ОАВ вакиллари иштирок этган маросимда сўзга чиққан Республика Маънавият ва маърифат маркази Наманган вилоят бўлими раҳбари Муҳаммадали Убайдуллаев мазкур фонд бугунги кун учун энг муҳим бўлган вазифа — маънавият ва маърифатни тарғиб этиш, бунга бел боғлаган инсонларни қўллаб-қувватлашни мақсад қилганини таъкидлади.

— Чиндан ҳам режаларимиз шундай, — дейди фонд васийлик кенгаши раиси, Наманган шаҳар кенгаши депутати Маъруфхон Мўминов. — Мазкур жамғарма орқали китобхонликни кенг тарғиб қилиш, кам таъминланган оилаларни бадиий адабиётлар билан таъминлаш, мактабгача таълим муассасалари, умумтаълим мактаблари, лицей, коллежлар, маҳаллаларда китоб акцияларини ўтказиб бориш, меҳрибонлик уйлари, ногиронлар, қариялар уйларида кутубхоналар ташкил этишни мўлжаллаганмиз. Бунга ҳисса қўшишни истаган барча инсонларга эшикларимиз очиқ.

Тадбирда фонд мутасаддилари вилоят ижодкорларининг китобларини нашр этишга кўмаклашиш, шароити мушкул оилаларнинг фарзандларининг олий ўқув юртларида таҳсил олишлари учун грантлар жалб этиш, аҳолининг китоб ўқишга бўлган қизиқишини орттириш мақсадида book café — «китоб қаҳвахонлари» ва busbook — «китоб автобуслари» фаолиятини йўлга қўйиш каби кўплаб режалари билан ўртоқлашди.