Россиянинг Эдвард Сноуденни АҚШга беришга тайёрлиги ҳақидаги гап-сўзлар асоссиз. Бу ҳақда Россия президентининг матбуот котиби Дмитрий Песковга асосланиб, «ТАСС» хабар бермоқда.
«Йўқ, бу ҳақда гап ҳам бўлиши мумкин эмас. Айтмоқчиманки, бундай келишувлар мутлақо ўринсиз», — дейди Песков ушбу саволга жавоб берар экан.
Сноуден 2013 йилда Америка махсус хизматларининг электрон кузатув усуллари, хусусан хорижий давлатлар етакчиларининг ўзаро музокараларини ноқонуний эшитиш ҳақидаги маълумотларни ошкор қилган.
АҚШ ҳукумати томонидан таъқибга учрашидан қўрқиб, Сноуден 20 дан ортиқ мамлакатлар, хусусан Россиядан бошпана сўраган.
2014 йилнинг 1 августида у Россия федерациясида уч йил яшаш ҳуқуқини қўлга киритган. Кейинроқ муддат худди шунча вақтга узайтирилган.
АҚШда Сноуден жосуслик ҳақидаги қонуннинг икки моддасини бузганликда айбланмоқда. Улардан ҳар бири бўйича Сноуденга 10 йилгача қамоқ жазоси берилиши мумкин.
АҚШ ҳукумати бир неча маротаба Сноуденни сотқин деб ҳисоблаши ҳамда у миллий хавфсизлик манфаатларига жиддий зарар етказгани учун уни кечирмаслигини маълум қилган.
Изоҳ (0)