Наманган вилоятида 24 март кунидан бошланган «Ёшлар ҳафталиги» доирасида 20 га яқин намунали тўй ўтказилди. Бу ҳақда Қаҳрамон Қуронбоевнинг Facebook’даги саҳифасида маълум қилинди.
Улар белгиланган тартиб асосида ихчам ва ортиқча дабдабасиз, ёшларнинг сайр қилиши учун 2 тадан машина билан ҳамда 120-150 кишидан иборат меҳмонлар иштирокида ўтказилди.
Шунингдек, тўёлди томонларнинг ўзаро сарполар, қимматбаҳо совғалар улашиш, тўйдан бир кун олдинги «сабзи тўғрар» каби ортиқча сарф–харажат талаб қиладиган урф-одатлар ўтказилмади.
Мурожаатларга биринчилар қаторида «лаббай» деб жавоб берган ёш оилаларнинг ҳар бирига Ёшлар иттифоқининг эсдалик совғаси сифатида 28 турдаги китоблар тўплами (жами 196 та китоб) тақдим этилди.
Шунингдек, янги турмуш қурганларга оиланинг муқаддас эканлиги,бурч ва масъулиятларини ёдга солиб турувчи махсус «Эслатма» ҳамда ёш оилаларнинг Бухоро шаҳридаги тарихий масканларга зиёрат саёҳати учун бепул йўлланма ҳам тақдим этилди.
Изоҳ (0)