Бугун 14 март куни Франция футбол федерацияси президенти маҳкамаси бошлиғи Кенни Жан Мари ва техник директор ўринбосари Людовик Дебрю Ўзбекистонга келди. Бу ҳақда ЎФА ахборот хизмати хабар бермоқда.
Миллий олимпия қўмитасида франциялик меҳмонларни Миллий олимпия қўмитаси президенти, ЎФА биринчи вице-президенти Умид Аҳмаджонов ва Жисмоний тарбия ва спорт вазири Шоакром Исроилов қабул қилди.
Жорий йилнинг 23 январь куни Ўзбекистон Миллий олимпия қўмитаси президенти ва Ўзбекистон футбол Ассоциацияси биринчи вице-президенти Умид Аҳмаджонов Парижда Франция футбол федерацияси мутассаддилари билан учрашиб, Ўзбекистонда футболни янги босқичга олиб чиқиш бўйича ўзаро ҳамкорлик қилиш борасида келишувга эришганди.
Жумладан, Франция футбол федерацияси президенти маҳкамаси Халқаро бўлим бошлиғи Кенни Жан Мари учрашув давомида болалар футболи бўйича франциялик мутахассисларни Ўзбекистонга олиб келиш, мамлакатдаги ёш футболчиларни Франция жамоаларига жалб қилиш, Суперлигада иштирок этадиган жамоаларнинг савиясини ошириш, уларнинг иш фаолиятини Европа андазалари асосида йўлга қўйиш мақсадида клублар бош директорлари ва академиялар раҳбарларини Парижга малака ошириш ва тажриба ўрганишга юбориш масалалари муҳокама қилинганди.
«Сиз билан Францияда учрашганимизда Ўзбекистонга боришга ваъда бергандик. Мана, ваъдамнинг устидан чиқиб, юртингизга ташриф буюрдик. Ўзбекистонда иқтидорли футболчилар жуда кўп эканини яхши биламиз. Ўзбекистон олимпия терма жамоаси Хитойда ўтган Осиё чемпионатида бош совринни қўлга киритгани бежиз эмас. Ана шу иқтидорларни тўғри йўналтириш орқали мамлакатингиз футболда катта натижаларга эришиши мумкин. Сиз, юқорида Миллий олимпия қўмитаси, Жисмоний тарбия ва спорт вазирлиги ва Ўзбекистон футбол Ассоциацияси биргаликда иш олиб бориши борасида гапириб ўтдингиз. Бу жуда тўғри йўл. Франция ҳам 40 йил аввал мана шу йўлни танлаган. Франция футболи ушбу даражага етиб келгунига қадар катта йўлни босиб ўтди. Хато ва камчиликларга йўл қўйилди.
Мақсадимиз, ўзимизнинг ривожланиш босқичимиз бўйича тажрибамиз билан ўртоқлашиш. Бунинг учун аввал юртингиздаги футбол бўйича умумий ҳолат билан яқиндан танишишимиз керак. Кейин хулоса қилиб, ўз таклифларимизни берамиз. Бунинг учун жаноб Людовик Дебрю Ўзбекистонда менга қараганда кўпроқ қолиб, вазият билан яқиндан танишади. Суперлига учрашувларини стадиондан томоша қилади. Стадионлар, инфратузилмаларни кўздан кечиради. Кейин ўзимизнинг амалий маслаҳатларимизни беришга ҳаракат қиламиз», — деди Кенни Жан Мари.
Франция футбол федерацияси вакиллари эртага ЎФАда маркетинг бўйича Ўзбекистондаги мутахассислар учун семинар ўтказишлари режалаштирилган. Кейин эса «Бунёдкор» стадионига бориб, у ер билан яқиндан танишади.
Изоҳ (0)