2018 йилнинг 4 март куни тахминан соат 15:30 ларда номаълум шахслар «Тошкент савдо маркази» бозори ёнида фуқаро К.Б.га ҳужум қилиб, 43300000 сўм пули ва Samsung русумли уяли телефонини босқинчилик йўли билан эгаллаб олди. Бу ҳақда Тошкент шаҳар ИИББ матбуот хизмати маълум қилди.
Шундан сўнг жабрланувчининг автомашинасидан фойдаланган ҳолда бир неча километр масофа босиб ўтиб, уни турар жой уйлари ёнида қолдирган ва эгаллаб олинган мол-мулк билан жиноят содир этилган жойдан яширинган. Мазкур ҳолат юзасидан Тошкент шаҳар ИИББ ҳузуридаги Тергов бошқармаси томонидан Жиноят кодексининг 267-моддаси билан жиноят иши қўзғатилди.
Тошкент шаҳар ИИББ ходимлари томонидан ўтказилган тергов-тезкор тадбирлари натижасида мазкур жиноятни Сергели туманида яшовчилар — муқаддам судланган, 1991 йилда туғилган Х. Шерзод ва 1978 йилда туғилган М. Мирзоҳид содир этганликлари аниқланди.
Содир этилган жиноятнинг оғирлик даражаси ва жиноятчиларнинг шахсини инобатга олиб, уларни Тошкент шаҳар ИИББ Жиноят қидирув бўлимининг малакали ходимлари ва махсус бўлим ходимлари билан ҳамкорликда ушлаш ҳақидаги қарорга келинди. Қўлга олиш давомида жиноятчилар фаол қаршилик кўрсатиб, яширинишга уринганига қарамай, улар зарарсизлантирилди.
Изоҳ (0)