CNN Россия АҚШнинг ишларига Pokemon Go ёрдамида «аралашгани»ни айтди

CNN телеканали даъво қилишича, Россия билан боғлиқ «АҚШдаги вазиятга таъсир ўтказиш»га уринишлар нафақат ижтимоий тармоқларда, балки YouTube видеосервиси ва Pokemon Go ўйини доирасида ҳам амалга оширилган, деб ёзади «РИА Новости».

Телеканал маълумотларига кўра, бунда гап аккаунтлари Facebook, Instagram, Twitter, Tumblr ижтимоий тармоқларида ва YouTube видеосервисида рўйхатдан ўтган Don’t Shoot Us («Бизни отманг») кампанияси ҳақида бормоқда. Кампания ташкилотчилари ушбу платформалардан полициянинг афро-америкаликларга нисбатан зўравонликлари билан боғлиқ кўплаб ҳолатларни ёритишда фойдаланган.

Кампаниянинг YouTube’даги барча видеороликлари donotshoot.us сайтига линк берган, ушбу сайтда эса Tumblr’даги аккаунтга асосланилган, у эса 2016 йил июлида Pokemon Go ўйини бўйича мусобақа ташкил қилган эди.

Мусобақа иштирокчиларини полиция зўравонлиги билан боғлиқ ҳодиса жойларига юборишган, шунингдек, ўз покемонларига ҳалок бўлган афро-америкаликларнинг номларини беришни таклиф қилишган.

Россиянинг ушбу кампанияга алоқадорлигининг исботи сифатида CNN ўз манбасига таянган ҳолда унинг Facebook’даги аккаунти «кремлпараст» тузилма бўлмиш Internet Research Agency билан боғлиқ эканлигини келтирди.