8 август куни Тошкентдаги «Анҳор-Локомотив» истироҳат боғи ўзининг бир ёшини нишонлади. Шу муносабат билан пойтахт аҳолиси ҳамда меҳмонлар учун катта байрам тадбири ташкиллаштирилди.
Боғга киришда карнар-сурнайлар садоси остида кичик меҳмонларни эртак қаҳрамонлари, раққослар, циркчилар кутиб олди ва уларга ҳаво шарлари ҳамда ширинликлар тарқатилди.
Кўнгилочар дастурни болалар ўртасидаги асфальтга сурат чизиш мусобақаси очиб берди. Энг яхши расм чизган болакайлар қимматли совғалар билан тақдирланди. Бошқа иштирокчилар ҳам эътибордан четда қолмади, уларга ҳам рағбатлантирувчи мукофотлар топширилди.
«Анҳор-Локомотив» истироҳат боғи бир йил олдин — 2016 йил 8 августда ўз ишини бошлаган эди. Ҳозирда боғда болалар ва катталар учун умумий миқдорда 40 га яқин кўнгилочар аттракцион фаолият кўрсатмоқда. Шунингдек, яқин вақтлар ичида яна 5 та аттракцион ўрнатилиши режалаштирилмоқда.
Боғ қурилганидан бери бу ерда анча нарса ўзгарди. Икки гектардан ортиқроқ майдонга 3600 дан ортиқ баргли ва декоратив дарахтлар, 2000 дан ортиқ манзарали буталар, кўп йиллик гулларнинг 4600 хили экилди. Боғнинг яшил майдонлари борган сари кенгайишни давом этмоқда.
Изоҳ (0)