Facebook иккинчи уринишда ўзининг Aquila номли учувчисиз учиш қурилмасининг синовини муваффақиятли ўтказди. Бу ҳақда Facebook бош директори Марк Цукерберг ўзининг саҳифасида маълум қилди, деб хабар берди «Коммерсантъ».
Ушувчисиз учиш қурилмаси қуёш энергияси ёрдамида ишлайди ва Facebook’нинг фикрича, у интернет етиб бормаган жойларга уни етказиш вазифасини бажаради.
Учувчисиз самолёт ўтган йилнинг июнида ўзининг биринчи тўлақонли парвозини АҚШнинг Юма шаҳрида амалга оширган эди, бироқ у парвознинг 96-дақиқасида қўнишни амалга ошираётиб ҳалокатга учраган. Аниқланишича, самолёт об-ҳавонинг ёмонлиги сабаб қулаб тушган. Иккинчи сафар ушбу турдаги қурилма ҳавода 1 соат 46 дақиқа парвоз қилди ва қўнишни муваффақиятли бажарди.
Facebook вакиллари биринчи парвоздаги хатоларни ҳисобга олганликларини ва учувчисиз учиш қурилмасини мукаммалштирганликларини маълум қилди. Эндиликда қурилма қаршиликка бардошли ва қўнишни амалга оширишда баландликни камайтирадиган янги қанотлар, шунингдек, силлиқ юза ҳамда қурилмани тўхтатишда хизмат қиладиган горизонтал паррак билан жиҳозланган.
Изоҳ (0)