БМТ бош котиби Антониу Гутерриш бугунги кунда дунёда одам савдоси мавжуд бўлган 106 мамлакат бор эканлигини маълум қилди, деб хабар беради «РИА Новости».
«Одам савдоси тармоқлари бутун дунёга тарқалган. Наркотиклар ва жиноятчилик бўйича бошқарма маълумотларига кўра, одам савдоси 106 мамлакатга бориб етган», — деди бош котиб БМТ Хавфсизлик кенгашининг қуролли можароларда одам савдоси муаммосига бағишланган йиғилишида.
Гутерршининг сўзларига кўра, ИШИД ва «Боко Ҳарам» ташкилотлари «нафақат очиқдан-очиқ асирликка олиш ва меҳнат қилишга мажбурлаш билан шуғулланмоқда, балки бу қонуний эканлигини ҳам таъкидламоқда».
Бош котиб Сурияда ИШИД асирлар бозорини ташкил этгани ва ҳатто аёллар ва қизларни ушлаш, назорат қилиш ва улар устида савдолашиш бўйича эслатма тарқатганини қайд этди.
Маълумот ўрнида, Халқаро меҳнат ташкилоти ахборотига кўра, дунёда 21 миллион киши мажбурий меҳнат билан шуғулланаётган бўлиб, бу жиноятчиларга 150 миллиард долларгача фойда келтирмоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)