Жанубий Корея, АҚШ ва Япония 14 март, сешанба куни КХДР томонидан ракета учирилишини кузатиш бўйича ҳамкорликдаги икки кунлик машқларни бошлади. Бу ҳақда Жанубий Корея ҳарбий-денгиз кучлари қўмондонлиги маълум қилди, дея хабар беради «ТАСС».
«Машқлар давомида Шарқий Япон денгизида ўқув ракетаси учирилади ва уни Aegis ахборот-бошқарув жанговар тизими билан жиҳозланган уч кема кузатиб боради. Машғулотларда «Седжонтэван» (Жанубий Корея), «Кирисима» (Япония) ва «Кёртис Уилбур» (АҚШ) кемалари иштирок этади», — дейилади қўмондонлик томонидан тарқатилган пресс-релизда.
Манёврлар чоғида уч томон ўртасида маълумот алмашинув тизими синовдан ўтказилиши режалаштирилган. Бундай машқлар олдинроқ уч маротаба — ўтган йил июнь, ноябрь ойларида ва жорий йил январида ўтказилган эди.
Маълумот учун, АҚШ ва Жанубий Корея қуролли кучлари 13 март, душанба куни фавқулодда ҳолат юз берганда Корея ярим оролида Америка қўшинларини кенгайтиришга қаратилган Key Resolve қўмондонлик-штаб машқларини ҳам бошлади.
Изоҳ (0)