Америкалик ҳарбийлар Мосул шаҳри озод этилгандан кейин Ироқ ҳукумати улардан мамлакатни тарк этишни сўрашини кутмаяпти. Бу ҳақда Ироқда ИШИД террорчилик гуруҳига қарши кураш бўйича халқаро коалиция қўмондони, генерал-лейтенант Стивен Таунсенд маълум қилди, деб ёзади «Корреспондент.net».

«Ҳукумат бу жуда мураккаб кураш эканлиги ва коалиция кўмаги Мосулдан кейин ҳам керак эканлигини тушунади деб ўйлайман», — деди Таунсенд Бағдодда журналистлар билан суҳбатда.

Генерал эндиликда коалиция кучлари чуқурроқ ва Ироқ тузилмаларига яқинроқ ҳаракат қилишини таъкидлади. «Биз шарқий Мосул учун кураш давомида позициямизни ўзгартирдик ва маслаҳатчиларимизни Ироқ кучларига яқинроқ йўналтирдик», — дея қўшимча қилди Таунсенд.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.