Доғистонлик сенатор ва миллиардер Сулейман Керимов Москвада таҳсил олаётган 21 ёшли ўғли Саид Керимовга Махачқалъа аэропортини совға қилди. Бу ҳақда Forbes’га асосланиб, «Вестник Кавказа» хабар бермоқда.
Шу йилнинг январь ойида Москва давлат халқаро муносабатлар институти талабаси Саид Керимов номига аэропортга эгалик қиладиган «Грандеко» компаниясининг 99,5 фоиз акциялари қайта расмийлаштирилди. Мазкур компания аввал унинг отаси Сулейман Керимовга тегишли бўлган.
Хабарда қайд этилишича, аввалроқ Керимов ва унинг ўғли Россиядаги йирик олтин конларини сотиб олиб, мамлакатнинг 28 фоиз олтин захиралари устидан назоратни қўлга олган.
Чоп этилган маълумотларга кўра, 2016 йили федерал аҳамиятга эга Махачқалъа аэропорти хизматларидан 869 200 йўловчи фойдаланган.
Маълумот учун, Сулейман Керимов Махачқалъанинг «Анжи» футбол клуби собиқ хўжайини саналади. У 2011 йили клубни харид қилган. Айнан ўша йили Ўзбекистон терма жамоасининг амалдаги сардори Одил Аҳмедов жамоа сафига қўшилиб, 2014 йилгача тўп сурган. Миллиардер 2016 йили «Анжи»ни Усмон Кадиевга сотиб юборган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)