Квебек-Ситидаги теракт ижрочисига 11 банд бўйича айблов эълон қилинди
Квебек провинцияси полицияси Квебек-Сити шаҳри масжидидаги теракт ижрочиси шахсини тасдиқлади. Унга нисбатан айблов эълон қилинди. Бу ҳақда 30 январь, душанба куни CBC телеканали маълум қилди, деб ёзади «ТАСС».
Аввалроқ теракт уюштиришда гумон қилинган икки эркакнинг шахси маълум бўлгани ҳақида хабар берилган эди.
Теракт ижрочиси 27 ёшли канадалик Александр Биссоннетт эканлиги маълум қилинди. Унга нисбатан олти кишини ўлдириш ва беш кишини ўлдиришга уриниш (гап оғир яраланган кишилар ҳақида бормоқда) бўйича айблов эълон қилинди. Мазкур иш бўйича иккинчи гумондор Муҳаммад Хадир сўроқ қилингандан кейин қўйиб юборилган ва энди теракт гувоҳи сифатида талқин қилинмоқда.
Биссоннетт масжидга ҳужум қилгандан кейин жиноят жойидан автомобилда қочиб кетган. Кейинроқ ўзи полицияга қўнғироқ қилган ва ҳибсга олинган. Унинг автомобилидан тўппонча ва иккита Калашников автомати топилганлиги маълум қилинмоқда. Шунингдек, қўлга олинган канадалик ислом динини қабул қилганлиги ҳақида маълумот тарқалган, бироқ бу маълумотлар расман тасдиқланмади.
Эслатиб ўтамиз, ҳужум оқибатида 6 киши ҳалок бўлди. Отишма чоғида бино ичида, турли маълумотлар бўйича, 40 дан 100 нафаргача киши бўлган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
