Ўзбекистон терма жамоаси ФИФА рейтинги тарихида илк бор Россиядан ўзиб кетади

Футбол бўйича Россия терма жамоаси ФИФАнинг янгиланган рейтингида катта эҳтимол билан 52-ўринни эгаллайди. Ҳозирда Станислав Черчесов қўли остидаги терма жамоа ФИФА рейтингида 38-поғонада бормоқда.

Россия учун бу тарихдаги энг ёмон натижа бўлади. Бундан аввалги антирекорд 1998 йили ўрнатилган бўлиб, унда Россия термаси 40-ўриндан жой олганди.

«Sports.ru» ФИФАнинг расман 20 октябрда чиқадиган рейтингида Россия терма жамоасидан ўзиб кетадиган 8 терма жамоани келтирди. Улар орасида Самвел Бабаян мураббийлиги остидаги Ўзбекистон миллий терма жамоаси ҳам бор.

Албания, 49-ўрин

Евро–2016 турнирида 3 очко тўплаган Албания ЖЧ–2018 мусобақасига саралаш босқичини Македония ва Лихтенштейн устидан эришилган ғалаба ва Испаниядан учралган мағлубият билан бошлади. Асосий юлдуз – Хюсай.

Конго Демократик Республикаси, 48-ўрин

Конго ДР ЖЧ–2018 турнирига саралаш босқичида Ливия термасини 4:0 ҳисобида мағлубиятга учратди. Асосий юлдузлар – Болази, Мбокани.

Ўзбекистон, 46-ўрин

Ўзбекистон ЖЧ–2018 турнирига 3-саралаш босқичининг дастлабки 4 турида Сурия (1:0), Қатар (1:0) ва Хитой термасини (2:0) мағлубиятга учратди. Самвел Бабаян шогирдлари фақатгина Эронга (0:1) ютқазиб қўйди. Асосий юлдуз – Одил Аҳмедов.

Эрон, 39-ўрин

Эрон терма жамоаси ЖЧ–2018 турнирига саралаш босқичида Қатар (2:0), Ўзбекистон (1:0) ва Жанубий Корея термаси (1:0) билан ўйинда 3 очкодан олишга муваффақ бўлди. Хитой билан ўйинда эса 0:0 ҳисоби қайд этилганди. Асосий юлдуз – Сардор Азмун.

Тунис, 36-ўрин

Тунис терма жамоаси ЖЧ–2018 турнирига саралаш босқичида Гвинеяни (2:0) мағлубиятга учратди. Асосий юлдуз – Абденнур.

Шимолий Ирландия, 35-ўрин

Шимолий Ирландия термаси Евро–2016 дан кейин унчалик яхши ўйин кўрсатмаяпти: Чехия билан дуранг, Германиядан мағлубият ва Сан-Марино билан ўйинда ғалаба. Асосий юлдуз – Жонни Эванс.

Сенегал, 32-ўрин

Сенегал ЖЧ–2018 турнирига саралаш босқичида Кабо-Вердени 2:0 ҳисобида таслим қилиб, ўз гуруҳида пешқадам бўлиб олди. Асосий юлдуз – Садьо Мане.

Руминия, 29-ўрин

Руминиия Евро–2016 дан кейин кўпчиликни ажаблантирмоқда. ЖЧ–2018 турнирига саралаш босқичида румияликлар Арманистон билан ўйинда 3 очко олди. Қозоғистон ва Черногория билан ўйинда дуранг қайд этилди. Асосий юлдуз – Влад Кирикеш.